Ukraina prezidenti Vladimir Zelenskiy Rossiya fuqaroligiga ega bo‘lgan nufuzli ukrainaliklar Ukraina fuqaroligidan mahrum qilinishi kerakligini aytdi. Bu haqda Meduza xabar bermoqda.
“Bizning vazifamiz bugungi kunda ikki yoki uch, jumladan, Rossiya Federatsiyasi fuqaroligiga ega bo‘lgan va davlatimizga siyosiy yoki ma’naviy ta’sir ko‘rsatadigan barcha odamlarning bitta — Rossiya Federatsiyasi fuqaroligida qolishini ta’minlashdir”, — dedi Zelenskiy 11-yanvar kuni Lvovdagi matbuot anjumanida.
Ukraina prezidentining so‘zlariga ko‘ra, Rossiya fuqaroligiga ega ukrainaliklar “tegishli davlat”da yashashi kerak. “Menimcha, bu mutlaqo adolatli bo‘ladi”, — deya qo‘shimcha qildi u.
Zelenskiy jurnalistlarning kelajakda Ukraina fuqaroligidan mahrum qilish bo‘yicha qanday qarorlar qabul qilinishi mumkinligi haqidagi savoliga shunday javob berdi.
10-yanvar kuni Ukraina prezidenti Ukrainaning to‘rt nafar xalq deputati: Viktor Medvedchuk, Taras Kozak, Andrey Derkach va Renat Kuzminni fuqarolikdan mahrum qilgandi. Zelenskiyning tushuntirishicha, qarorlar ushbu odamlar “boshqa davlatlar fuqaroligiga ega ekani” tufayli qabul qilingan.
2022-yil iyul oyida Ukrainada Vladimir Zelenskiy tadbirkor Igor Kolomoyskiyni fuqarolikdan mahrum qilgani haqida ma’lumot paydo bo‘lgandi. Bu ma’lumot rasman tasdiqlanmagan.
Izoh (0)