O‘zbekistonda kichik gidroelektrostansiyalar qurish huquqi uchun o‘tkaziladigan auksion tartib-tamoyillari belgilandi. Bu haqda “Daryo”ga “Elektron onlayn auksionlarni tashkil etish markazi” xabar qildi.
Platformada kichik gidroelektrstansiyalarni qurish bo‘yicha loyiha tashabbuskorlarini aniqlashda onlayn auksion savdosi elektr energiyasini sotib olish tarifini pasaytirib borish shaklida o‘tkaziladi.
Auksion savdosida har bir auksion qadami 10 foizdan kamayib boradi. Lot zakalat puli loyihaning oylik ishlab chiqarish quvvatidan kelib chiqqan holda belgilanadi.
Mikro va kichik gidroelektrostansiyalarini qurish uchun yer uchastkasi 20 yil muddatga ijaraga beriladi.
Onlayn auksion g‘olibiga ijara shartnomasini imzolash uchun 60 kalendar kun davomida muddat beriladi. G‘olib loyihani 2 yil muddatda ishga tushirish majburiyatini qabul qilib oladi.
Ayni paytda Qashqadaryo, Surxondaryo, Toshkent va Farg‘ona viloyatlaridan 14 ta loyihalar auksionga chiqarilgan bo‘lib, ushbu loyihalar bo‘yicha savdolarda kompaniyalar ishtirok etishi mumkin.
Onlayn auksion shartlari haqida batafsil ma’lumotni “E-auskion” portalidan olish mumkin.
Avvalroq O‘zbekistonda 2023-yilda 100 ta mikro-GES qurish bo‘yicha loyihalar boshlanishi haqida xabar berilgan edi.
Izoh (0)