AQSHning Amazon kompaniyasi Buyuk Britaniyadagi uchta ombori yopilishini e’lon qildi. Bu esa kamida 1 200 nafar xodimning qisqarishiga olib kelishi mumkin. Bu haqda “TASS” xabar berdi.
Amazon rahbariyati, avval xabar qilinganidek, jami 18 mingdan ortiq xodimni ishdan bo‘shatishni rejalashtirmoqda.
Kompaniya vakillarining ta’kidlashicha, bu qaror 2023-yilga mo‘ljallangan rejalashtirish doirasida “iqtisoddagi noaniqlik va so‘nggi ikki yil ichida ko‘p sonli xodimlarning ishga olinishi munosabati bilan” qabul qilingan.
Shu bilan birga, o‘sha paytda rahbariyat xodimlarni qo‘shimcha qisqartirishlar istisno qilinmagani haqida ogohlantirgan.
Ta’kidlanishicha, asosan savdo va ishga yollash bo‘limlaridagi xodimlar ishdan bo‘shatiladi.
2020-yildan beri Amazon xodimlari soni deyarli ikki baravar ko‘paydi, ammo shunga qaramay, kompaniya daromadlarining o‘sishi sekinlashdi.
Shuningdek, investorlarning xarajatlarni cheklash bo‘yicha bosimi tufayli firma foyda keltirmaydigan bo‘linmalarni tekshirishga kirishgani ma’lum qilindi.
Avvalroq Amazon asoschisi o‘z boyligining katta qismini xayriya qilmoqchiligini ma’lum qilgan edi.
Izoh (0)