2021-yilda dunyoning eng yaxshi restorani deb topilgan Daniya poytaxti Kopengagendagi Noma restorani 2024-yildan boshlab mijozlarni qabul qilmaydi. Bu haqda The New York Times xabar bermoqda.
Restoran oshpazi Rene Redzepi bunday qarorga xodimlarning muntazam ortiqcha ish vaqti va yomon ish sharoitlari sabab bo‘lganini tushuntirdi. Restoran yopilgandan keyin oziq-ovqat laboratoriyasiga aylantiriladi.
“Umid qilamanki, biz butun dunyoga odamlarni charchatadigan yomon boshqaruv bilan og‘ir, mashaqqatli va kam haq to‘lanadigan ish o‘rniga ijodkorlik va ish jarayonida zavqlanish mumkinligini isbotlay olamiz”, — deydi Rene Redzepi NYT nashriga bergan intervyusida.
Yopilgandan so‘ng, restoran o‘zining Noma Projects onlayn-do‘koni uchun yangi taomlar va mahsulotlar ishlab chiqaradi.
Redzepining so‘zlariga ko‘ra, Noma’da ishning yuqori standartlarini saqlab qolish uchun mashaqqatli soatlarda xodimlarga adolatli tovon to‘lash tamoyili ishlamaydi.
NYT’ga bergan intervyusida Rene Redzepi restoran sanoatini “butunlay qayta ko‘rib chiqish” kerakligini ta’kidlagan.
Restoranda o‘nlab odamlar ishlaydi, ularning 20-30 nafari stajyor bo‘lib, ular faqat 2022-yilning noyabr oyidan maosh olishni boshlagan.
Restoran xodimlari ommaviy axborot vositalariga 16 soatlik smenalar, shu jumladan maoshsiz stajyorlar ham Noma uchun odatiy hol ekanligini aytib keladi.
Noma 2003-yilda Kopengagenda ochilgan va Skandinaviya oshxonasiga ixtisoslashgan. Restoran 2010, 2011, 2012, 2014 va 2021-yillarda dunyoning eng yaxshi restorani deb tan olingan.
Izoh (0)