Roman Abramovichning ro‘yxatga olinmagan ko‘plab yaxtalari bor — Forbes
Rossiyalik milliarder Roman Abramovichning bir qancha deklaratsiya qilinmagan mol-mulki bor. Bunga biznesmenning offshor kompaniyalari va trast fondlari orqali ro‘yxatdan o‘tgan kamida o‘nta yaxta va qayiqlari kiradi. Bu haqda Korrupsiya va uyushgan jinoyatchilikni tergov qilish markazi ma’lumotlariga tayanib Forbes xabar bermoqda.
Bu boyliklardan tashqari milliarderning umumiy qiymati kamida 1 milliard dollar bo‘lgan oltita yaxtasi borligi ma’lum, deya qayd etadi nashr.
Forbes ma’lumotlariga ko‘ra, Roman Abramovichning sakkizta qayig‘i hozir Turkiyaning Bodrum shahrida joylashgan 427 million dollarlik Eclipse megayaxtasiga xizmat ko‘rsatish uchun ishlatiladi.
Nashr Kewpie’ni deklaratsiya qilinmagan yaxtalar ichida eng qimmati deb atagan. Uning narxi taxminan 3 million dollarga baholanmoqda.
Kema Bermud orollarida ro‘yxatga olingan va Fransiyada joylashgan. Shuningdek, milliarderning Umbra A qayig‘i borligi ma’lum bo‘ldi. Uning taxminiy narxi 1 million dollarni tashkil qiladi.
6-yanvar kuni The Guardian gazetasi Ukrainada maxsus operatsiya boshlanishidan uch hafta oldin Abramovich o‘nta maxfiy offshor trestini qayta tashkil etgani haqida xabar bergan edi.
Benefisiarlar milliarderning farzandlari edi. Bu aktivlar kamida 4 milliard dollarga teng. Roman Abramovich o‘z aktivlarini G‘arb hukumatlari Ukrainada qurolli mojaro yuzaga kelgan taqdirda rossiyalik oligarxlarga nisbatan sanksiyalar qo‘llash rejalari haqida ogohlantirganidan bir necha kun o‘tib topshirdi.
Maxsus operatsiya boshlanishidan avval Roman Abramovichning boyligi 18 milliard dollarga baholangan edi.
Mart oyida u Yevropa Ittifoqi va Buyuk Britaniya sanksiyalari ostida qoldi. Dekabr oyida Kanadada milliarderning 26 million dollarlik aktivlarini hibsga olish va musodara qilish jarayoni boshlandi.
Forbes’ning 2022-yil oxiridagi hisob-kitoblariga ko‘ra, Abramovichning boyligi taxminan 8 milliard dollarni tashkil qiladi.
Mavzuga doir:
- “Kim bilan do‘st bo‘lishni biladigan” milliarder: Roman Abramovich qanday qilib Rossiyaning eng boy odamlaridan biriga aylandi? (foto)
- Hashamatli saroylar, “Chelsi” va yaxtalar — Roman Abramovichning London imperiyasi sanksiyalar yomg‘iri ostida parchalanib ketdi
