CNN telekanali Xitoyning bir qator shaharlari aks etgan sun’iy yo‘ldosh tasvirlarini e’lon qildi, ularda mamlakatda kuchli cheklovlar bekor qilinganidan keyin “COVID-19 bilan kasallanishning misli ko‘rilmagan to‘lqiniga qarshi kurash davom etayotgan” bir paytda krematoriy va dafn etish idoralariga uzundan-uzoq navbatlarni ko‘rish mumkin.
Tasvirlar Maxar Technologies kompaniyasi tomonidan dekabr va yanvarda olingan. Ularda, xususan, Pekin tashqarisidagi, shuningdek, Kunmin, Nankin, Chendu, Tanshan va Xuchjoudagi dafn byurolari yaqinidagi avtomobillardan iborat navbatlar aks etgan.
Suratlardan birida Kunmindagi dafn byurosi joylashgan ko‘chani ko‘rish mumkin, u o‘tgan yili olingan. Xuddi o‘sha joy aks etgan, ammo o‘tgan hafta olingan tasvirda esa bino yaqinidagi mashinalar ko‘payganini ko‘rish mumkin. Bu tasvirlar, deb yozadi CNN, OAVlarda va ijtimoiy tarmoqlarda mamlakatdagi dafn byurolari va krematoriylar to‘lib ketgani haqida paydo bo‘layotgan xabarlarni tasdiqlaydi.
Shu bilan birga, rasmiy ma’lumotlarga ko‘ra, hukumat koronavirusga nisbatan “nol bardoshlilik” siyosatini yakunlashni boshlagan 7-dekabrdan buyon Xitoyda COVID-19 dan bor-yo‘g‘i 37 ta o‘lim qayd etilgan. 9-yanvar kuni Xitoyning kasalliklar nazorati va profilaktikasi bo‘yicha markazi uchta o‘lim holati haqida ma’lum qildi, undan avvalgi kun esa rasman ikkita o‘lim haqida xabar berilgan.
Avvalroq Yevroittifoq hukumati Xitoyga COVID-19 ning yangi to‘lqiniga qarshi kurashda yordam sifatida virusga qarshi bepul vaksinalarni yetkazib berishni taklif qilgan edi. Sog‘liqni saqlash masalalari bo‘yicha yevrokomissar Stella Kiriakides koronavirusning dunyo bo‘ylab qaytadan avj olishi ehtimoliga “yevropacha javob”ni ishlab chiqmoqchiligi aytilgandi.
25-dekabr kuni koronavirus bilan kasallanish darajasi keskin oshishi tufayli, Xitoy virus haqidagi kundalik ma’lumotlarni e’lon qilishni to‘xtatdi. Kasallanish holatlari Xitoy hukumatining koronavirus cheklovlariga qarshi noroziliklar fonida cheklov choralarini yumshatish haqidagi qaroridan keyin ko‘paydi. Avstraliya va Kanada Xitoydan kelgan sayyohlar uchun koronavirusga qarshi testni joriy qildi.
Izoh (0)