Xitoy 2023-yil 8-yanvardan boshlab mamlakatga keluvchilar uchun PZR testi topshirishni bekor qiladi. Mamlakat Bosh bojxona boshqarmasi saytida bu haqda ma’lum qilindi.
Xabarga ko‘ra, 8-yanvardan boshlab Xitoy sovitilgan va muzlatilgan oziq-ovqat mahsulotlarini koronavirusga tekshirishni ham to‘xtatadi. Hukumat mamlakat bo‘ylab koronavirusga qarshi cheklov choralarini yumshatishga qaror qilgan. Endilikda hududiy-ma’muriy birliklar tomonidan koronavirus tarqalishining yuqori xavfli zonalarini joriy etish o‘rniga, muayyan uylar, binolar yoki xonadonlar uchun cheklovlar kiritiladi.
Bundan tashqari, Xitoyga kelgandan keyin karantin o‘tash ham bekor qilinadi. Kasallikning simptomsiz shaklida bemor uyda davolanishni yoki markazlashtirilgan karantinni tanlash huquqiga ega.
Ta’kidlanishicha, yanvar oyidan boshlab Xitoyga kelgach, test topshirish shart emas. Biroq kirishdan 48 soat oldingi test natijalarini taqdim etish majburiydir.
Xitoyda kasallanishlar soni rekord o‘rnatmoqda, buning fonida kovid statistikasini e’lon qilish to‘xtatilgan. Mamlakatda so‘nggi uch haftada 250 millionga yaqin odam koronavirusga chalingan, bir kunda esa 37 million kishida koronavirus qayd etilgan.
Izoh (0)