“Afg‘on Bryus Lisi” deb ataladigan afg‘onistonlik aktyor Abbos Alizoda vatanini tashlab, Angliyaga ko‘chib o‘tishga majbur bo‘ldi. Bu haqda Alizoda Kanadaning Toronto Star nashriga bergan intervyusida hikoya qildi.
Aktyorning so‘zlariga ko‘ra, Afg‘onistonda “Tolibon” hokimiyat tepasiga kelishi bilan u ham boshqa afg‘on san’atkorlari, sportchi va musiqachilari kabi xavf ostida qolgan, chunki ularning faoliyati “islomga zid” deb hisoblanadi.
Alizoda aktyor va etnik xazarlar guruhining vakili sifatida bir yildan ko‘proq vaqt davomida yashirinib yurishga majbur bo‘lgan. Garchi qidiruvga berilmagan bo‘lsa-da, u e’tibor tortmaslik va mashhurligi uchun hibsga olinmaslik uchun soqol o‘stirgan.
Aktyorning so‘zlariga ko‘ra, u Gollivud rejissyorlaridan biri bilan bog‘langan va 2020-yilda AQSHga ishchi viza olish arafasida bo‘lgan, ammo “Tolibon” kelishi bilan Amerikaning Kobuldagi elchixonasi yopilgan, Islomoboddagi diplomatik vakolatxonasidan esa Alizodaga viza bo‘yicha javob berilmagan. 2022-yilda u IRCC’ning Kanadadagi ofisiga o‘zi va oilasining boshqa joyga ko‘chirilishini so‘rab o‘ndan ortiq elektron pochta xabarlari yuborgan, ammo bu ham javobsiz qolgan.
Oxir-oqibat Alizoda 2022-yil dekabr oyida Britaniya nodavlat tashkiloti homiyligida evakuatsiya qilingan 32 nafar afg‘on sportchisi orasiga qo‘shilgan. U Buyuk Britaniyada yashash uchun ruxsatnoma olib, hozir Manchesterda istiqomat qilmoqda. Aktyorning aytishicha, u tez orada o‘z orzusini ro‘yobga chiqaradi — 2023-yilning yozida ishlanishi rejalashtirilgan Gollivud filmida suratga tushadi.
Izoh (0)