CNN телеканали Хитойнинг бир қатор шаҳарлари акс этган сунъий йўлдош тасвирларини эълон қилди, уларда мамлакатда кучли чекловлар бекор қилинганидан кейин «COVID-19 билан касалланишнинг мисли кўрилмаган тўлқинига қарши кураш давом этаётган» бир пайтда крематорий ва дафн этиш идораларига узундан-узоқ навбатларни кўриш мумкин.
Тасвирлар Maxar Technologies компанияси томонидан декабрь ва январда олинган. Уларда, хусусан, Пекин ташқарисидаги, шунингдек, Кунмин, Нанкин, Ченду, Таншан ва Хучжоудаги дафн бюролари яқинидаги автомобиллардан иборат навбатлар акс этган.
Суратлардан бирида Кунминдаги дафн бюроси жойлашган кўчани кўриш мумкин, у ўтган йили олинган. Худди ўша жой акс этган, аммо ўтган ҳафта олинган тасвирда эса бино яқинидаги машиналар кўпайганини кўриш мумкин. Бу тасвирлар, деб ёзади CNN, ОАВларда ва ижтимоий тармоқларда мамлакатдаги дафн бюролари ва крематорийлар тўлиб кетгани ҳақида пайдо бўлаётган хабарларни тасдиқлайди.
Шу билан бирга, расмий маълумотларга кўра, ҳукумат коронавирусга нисбатан «нол бардошлилик» сиёсатини якунлашни бошлаган 7 декабрдан буён Хитойда COVID-19 дан бор-йўғи 37 та ўлим қайд этилган. 9 январь куни Хитойнинг касалликлар назорати ва профилактикаси бўйича маркази учта ўлим ҳолати ҳақида маълум қилди, ундан аввалги кун эса расман иккита ўлим ҳақида хабар берилган.
Аввалроқ Евроиттифоқ ҳукумати Хитойга COVID-19 нинг янги тўлқинига қарши курашда ёрдам сифатида вирусга қарши бепул вакциналарни етказиб беришни таклиф қилган эди. Соғлиқни сақлаш масалалари бўйича еврокомиссар Стелла Кириакидес коронавируснинг дунё бўйлаб қайтадан авж олиши эҳтимолига «европача жавоб»ни ишлаб чиқмоқчилиги айтилганди.
25 декабрь куни коронавирус билан касалланиш даражаси кескин ошиши туфайли, Хитой вирус ҳақидаги кундалик маълумотларни эълон қилишни тўхтатди. Касалланиш ҳолатлари Хитой ҳукуматининг коронавирус чекловларига қарши норозиликлар фонида чеклов чораларини юмшатиш ҳақидаги қароридан кейин кўпайди. Австралия ва Канада Хитойдан келган сайёҳлар учун коронавирусга қарши тестни жорий қилди.
Изоҳ (0)