Belarus prezidenti Aleksandr Lukashenko Rossiya fuqarosi Sofya Sapeganing afv so‘rab qilgan murojaatini rad etdi. Bu haqda “Mediazona. Belarus” nashri Sapegalar oilasi advokati Anton Gashinskiyga tayanib xabar berdi.
Advokat “RBK”ga ma’lum qilishicha, ular endi jazoni o‘tash uchun uni Rossiya Federatsiyasiga yuborishni so‘raydi. Uning so‘zlariga ko‘ra, bunday ariza bilan Sapeganing o‘zi yoki uning ota-onasi murojaat qilishi mumkin. Tegishli so‘rov yaqin orada beriladi, dedi advokat.
Anton Gashinskiy qayd etishicha, avvalroq Aleksandr Lukashenko Sapega Rossiya koloniyasiga ko‘chirilishiga qarshi bo‘lmagan.
Sofya Sapeganing onasi Anna Dudich BBC’ga aytib berishicha, Belarus hukumatining qarori haqida qizining xatlaridan xabar topgan. “Bugun xat oldik, unda qizim 4-yanvar kuni rad javobi olganini yozgan”, — dedi Dudich.
Sofya Sapega kim?
Sofya Sapega 2021-yil mayida o‘zining o‘sha paytdagi yigiti, Nexta Telegram-kanali sobiq bosh muharriri Roman Protasevich bilan birga qo‘lga olingan edi. Ularning Afinadan Vilnyusga uchayotgan Ryanair reysi shoshilinch tarzda Minskka qo‘ndirilgandi.
Sapega Belarus xavfsizlik kuchlarining shaxsiy ma’lumotlari e’lon qilinib boruvchi “Belarus qora kitobi” Telegram-kanaliga administratorlik qilishda ayblandi. 2022-yil mayida u ijtimoiy dushmanlikni qo‘zg‘atish va shaxsiy ma’lumotlarni noqonuniy to‘plash haqidagi moddalar bo‘yicha olti yillik koloniyaga hukm qilindi.
Hukm e’lon qilinganidan keyin Belarus prezidenti Aleksandr Lukashenko Sapegani “bechora qizcha” deb atab, uni Rossiyaga topshirish mumkinligini aytgandi. “Jazo muddatini o‘sha yerda o‘tasin. Yoki istaganlarini qilishsin”, — degandi u.
Sapega 2021-yilning dekabr oyida Aleksandr Lukashenkodan afv so‘ragan edi. Qizning o‘gay otasi u “tergov bilan kelishuvga, Rossiyaning yordamiga, ekstraditsiyaga va ish umuman sudgacha bormasligiga umid qilayotganini” aytgandi.
Shundan keyin 2022-yil iyunida u yana Lukashenko nomiga afv etish to‘g‘risida ariza yozdi. Nashr ma’lumotlariga ko‘ra, arizada Sapega jinoyatni “qo‘poruvchilik kayfiyatidagi odamlar guruhi” ta’siri ostiga tushgan holda, “yoshlik va ahmoqlik qilib” amalga oshirganini yozgan. O‘shanda BBC qiz jabrlanuvchilarga tovon pulini to‘liq to‘lamagani afv etilish uchun to‘siq bo‘lishi mumkinligini qayd etgandi.
Roman Protasevich hibsga olinganidan so‘ng jinoiy ishi bo‘yicha tergov bilan hamkorlik qila boshladi, shuningdek, u Belarus va Rossiyadagi hukumatparast ommaviy axborot vositalariga bir nechta intervyular berdi. Hozir u uy qamog‘ida, internetdan foydalanishga ruxsat berilgan. Protasevichga qarshi sud hali boshlanmagan.
Izoh (0)