Belarusda olti yillik koloniyaga hukm qilingan rossiyalik Sofya Sapega prezident Aleksandr Lukashenko nomiga afv etish to‘g‘risida ariza yozdi. Bu haqda advokatga tayanib, BBC Russia xabar bergan.
Nashr ma’lumotlariga ko‘ra, arizada Sapega jinoyatni “qo‘poruvchilik kayfiyatidagi odamlar guruhi” ta’siri ostiga tushgan holda, “yoshlik va ahmoqlik qilib” amalga oshirganini yozgan.
BBC qayd etishicha, qiz jabrlanuvchilarga tovon pulini to‘liq to‘lamagani afv etilish uchun to‘siq bo‘lishi mumkin.
Sofya Sapega 2021-yil mayida o‘zining o‘sha paytdagi yigiti, Nexta Telegram-kanali sobiq bosh muharriri Roman Protasevich bilan birga qo‘lga olingan edi. Ularning Afinadan Vilnyusga uchayotgan Ryanair reysi shoshilinch tarzda Minskka qo‘ndirilgandi.
Sapega Belarus xavfsizlik kuchlarining shaxsiy ma’lumotlari e’lon qilinib boruvchi “Belarus qora kitobi” Telegram-kanaliga administratorlik qilishda aylandi. 2022-yil mayida u ijtimoiy dushmanlikni qo‘zg‘atish va shaxsiy ma’lumotlarni noqonuniy to‘plash haqidagi moddalar bo‘yicha olti yillik koloniyaga hukm qilindi.
Hukm e’lon qilinganidan keyin Belarus prezidenti Aleksandr Lukashenko Sapegani “bechora qizcha” deb atab, uni Rossiyaga topshirish mumkinligini aytgandi. “Jazo muddatini o‘sha yerda o‘tasin. Yoki istaganlarini qilishsin”, — degandi u.
Sapega 2021-yilning dekabr oyida ham Aleksandr Lukashenkodan afv so‘ragan edi. Qizning o‘gay otasi u “tergov bilan kelishuvga, Rossiyaning yordamiga, ekstraditsiyaga va ish umuman sudgacha bormasligiga umid qilayotganini” aytgandi.
Roman Protasevich hibsga olinganidan so‘ng jinoiy ishi bo‘yicha tergov bilan hamkorlik qila boshladi, shuningdek, u Belarus va Rossiyadagi hukumatparast ommaviy axborot vositalariga bir nechta intervyular berdi. Hozir u uy qamog‘ida, internetdan foydalanishga ruxsat berilgan. Protasevichga qarshi sud hali boshlanmagan.
Izoh (0)