Беларусь президенти Александр Лукашенко Россия фуқароси Софя Сапеганинг афв сўраб қилган мурожаатини рад этди. Бу ҳақда «Медиазона. Беларусь» нашри Сапегалар оиласи адвокати Антон Гашинскийга таяниб хабар берди.
Адвокат «РБК»га маълум қилишича, улар энди жазони ўташ учун уни Россия Федерациясига юборишни сўрайди. Унинг сўзларига кўра, бундай ариза билан Сапеганинг ўзи ёки унинг ота-онаси мурожаат қилиши мумкин. Тегишли сўров яқин орада берилади, деди адвокат.
Антон Гашинский қайд этишича, аввалроқ Александр Лукашенко Сапега Россия колониясига кўчирилишига қарши бўлмаган.
Софя Сапеганинг онаси Анна Дудич BBC’га айтиб беришича, Беларусь ҳукуматининг қарори ҳақида қизининг хатларидан хабар топган. «Бугун хат олдик, унда қизим 4 январь куни рад жавоби олганини ёзган», — деди Дудич.
Софя Сапега ким?
Софя Сапега 2021 йил майида ўзининг ўша пайтдаги йигити, Nexta Telegram-канали собиқ бош муҳаррири Роман Протасевич билан бирга қўлга олинган эди. Уларнинг Афинадан Вильнюсга учаётган Ryanair рейси шошилинч тарзда Минскка қўндирилганди.
Сапега Беларусь хавфсизлик кучларининг шахсий маълумотлари эълон қилиниб борувчи «Беларусь қора китоби» Telegram-каналига администраторлик қилишда айбланди. 2022 йил майида у ижтимоий душманликни қўзғатиш ва шахсий маълумотларни ноқонуний тўплаш ҳақидаги моддалар бўйича олти йиллик колонияга ҳукм қилинди.
Ҳукм эълон қилинганидан кейин Беларусь президенти Александр Лукашенко Сапегани «бечора қизча» деб атаб, уни Россияга топшириш мумкинлигини айтганди. «Жазо муддатини ўша ерда ўтасин. Ёки истаганларини қилишсин», — деганди у.
Сапега 2021 йилнинг декабрь ойида Александр Лукашенкодан афв сўраган эди. Қизнинг ўгай отаси у «тергов билан келишувга, Россиянинг ёрдамига, экстрадицияга ва иш умуман судгача бормаслигига умид қилаётганини» айтганди.
Шундан кейин 2022 йил июнида у яна Лукашенко номига афв этиш тўғрисида ариза ёзди. Нашр маълумотларига кўра, аризада Сапега жиноятни «қўпорувчилик кайфиятидаги одамлар гуруҳи» таъсири остига тушган ҳолда, «ёшлик ва аҳмоқлик қилиб» амалга оширганини ёзган. Ўшанда BBC қиз жабрланувчиларга товон пулини тўлиқ тўламагани афв этилиш учун тўсиқ бўлиши мумкинлигини қайд этганди.
Роман Протасевич ҳибсга олинганидан сўнг жиноий иши бўйича тергов билан ҳамкорлик қила бошлади, шунингдек, у Беларусь ва Россиядаги ҳукуматпараст оммавий ахборот воситаларига бир нечта интервьюлар берди. Ҳозир у уй қамоғида, интернетдан фойдаланишга рухсат берилган. Протасевичга қарши суд ҳали бошланмаган.
Изоҳ (0)