«Афғон Брюс Лиси» деб аталадиган афғонистонлик актёр Аббос Ализода ватанини ташлаб, Англияга кўчиб ўтишга мажбур бўлди. Бу ҳақда Ализода Канаданинг Toronto Star нашрига берган интервьюсида ҳикоя қилди.
Актёрнинг сўзларига кўра, Афғонистонда «Толибон» ҳокимият тепасига келиши билан у ҳам бошқа афғон санъаткорлари, спортчи ва мусиқачилари каби хавф остида қолган, чунки уларнинг фаолияти «исломга зид» деб ҳисобланади.
Ализода актёр ва этник хазарлар гуруҳининг вакили сифатида бир йилдан кўпроқ вақт давомида яшириниб юришга мажбур бўлган. Гарчи қидирувга берилмаган бўлса-да, у эътибор тортмаслик ва машҳурлиги учун ҳибсга олинмаслик учун соқол ўстирган.
Актёрнинг сўзларига кўра, у Голливуд режиссёрларидан бири билан боғланган ва 2020 йилда АҚШга ишчи виза олиш арафасида бўлган, аммо «Толибон» келиши билан Американинг Кобулдаги элчихонаси ёпилган, Исломободдаги дипломатик ваколатхонасидан эса Ализодага виза бўйича жавоб берилмаган. 2022 йилда у ИРCCънинг Канададаги офисига ўзи ва оиласининг бошқа жойга кўчирилишини сўраб ўндан ортиқ электрон почта хабарлари юборган, аммо бу ҳам жавобсиз қолган.
Охир-оқибат Ализода 2022 йил декабрь ойида Британия нодавлат ташкилоти ҳомийлигида эвакуация қилинган 32 нафар афғон спортчиси орасига қўшилган. У Буюк Британияда яшаш учун рухсатнома олиб, ҳозир Манчестерда истиқомат қилмоқда. Актёрнинг айтишича, у тез орада ўз орзусини рўёбга чиқаради — 2023 йилнинг ёзида ишланиши режалаштирилган Голливуд фильмида суратга тушади.
Изоҳ (0)