Braziliyaning sobiq prezidenti Jair Bolsonaru AQSHda kasalxonaga yotqizildi, deb xabar bermoqda Braziliyaning Globo telekanali.
Globe ma’lumotlariga ko‘ra, Bolsonaru hozir Florida shtatining Orlando shahridagi AdventHealth Celebration kasalxonasida. U qorin sohasidagi kuchli og‘riqlar tufayli shifoxonaga yotqizilgan.
Globo sobiq prezidentning sog‘ligidagi muammolari 2018-yilda uning pichoqlangani bilan bog‘liqligini taxmin qildi. Telekanal ma’lumotlariga ko‘ra, 2022-yilning yanvar, mart va noyabr oylarida ham u xuddi shu muammo tufayli kasalxonaga yotqizilgan.
2018-yilda Jair Bolsonaruga saylovoldi kampaniyasi vaqtida pichoq bilan hujum qilishgan. U qornidan yaralangan, ichaklarga zarar yetgan. Shundan so‘ng Bolsonaru bir nechta operatsiyalarni boshdan o‘tkazdi, ulardan ba’zilarining hujumga aloqasi yo‘q edi.
Eslatib o‘tamiz, 2023-yil 8-yanvar kuni, Braziliyaning yangi prezidenti Luis Inasiu Lula da Silvaning inauguratsiyasidan bir hafta o‘tib Jair Bolsonaru tarafdorlari mamlakat poytaxti Braziliyadagi prezident saroyiga bostirib kirdi. Minglab namoyishchilar hukumat binolari oldidagi to‘siqlarni buzib o‘tib, politsiya bilan to‘qnashdi. 1,5 mingdan ortiq odam hibsga olindi.
Izoh (0)