Finlyandiya NATOga qo‘shilgandan keyin hududiga yadro quroli joylashtirmasligini ma’lum qildi

Finlyandiya NATOga a’zo bo‘lganidan keyin o‘z hududida yadro qurolini joylashtirmaydi. Bu haqda mamlakat tashqi ishlar vaziri Pekka Xaavisto ma’lum qildi.

Uning so‘zlariga ko‘ra, NATOga a’zo bo‘lish jarayoni yakunlanganidan keyin ham Finlyandiya zaminida yadro quroli bo‘lmasligi aniq. Shu bilan birga, Xaavisto Finlyandiya a’zolikka ariza berish uchun hech qanday old shartlar qo‘ymaganini eslatdi.

Xaavisto, shuningdek, Finlyandiya Shvetsiya bilan bir vaqtda alyansga a’zo bo‘lishini aytdi. U ikki davlatning bir vaqtda blokka qo‘shilishi harbiy zarurat ekanini qayd etdi.

Xaavistoning bayonotlari “Xalq va mudofaa” konferensiyasida yangradi. Bu anjumanda NATO rahbari Yens Stoltenberg va Shvetsiya bosh vaziri Ulf Kristersson ham ishtirok etdi.

Shvetsiya Finlyandiya bilan birgalikda NATOga a’zo bo‘lish uchun ariza bergandi, biroq ularning alyansga qo‘shilish jarayoni Turkiya va Vengriya tomonidan bloklandi. NATOga a’zo bo‘lish uchun NATO a’zolarining barchasidan rozilik kerak. Turkiya rasmiylarining asosiy talabi Anqarada terrorchi deb topilgan fuqarolarni, birinchi navbatda Kurdiston Ishchilar partiyasini ekstraditsiya qilish bo‘ldi.