Финляндия НАТОга қўшилгандан кейин ҳудудига ядро қуроли жойлаштирмаслигини маълум қилди

Финляндия НАТОга аъзо бўлганидан кейин ўз ҳудудида ядро қуролини жойлаштирмайди. Бу ҳақда мамлакат ташқи ишлар вазири Пекка Хаависто маълум қилди.

Унинг сўзларига кўра, НАТОга аъзо бўлиш жараёни якунланганидан кейин ҳам Финляндия заминида ядро қуроли бўлмаслиги аниқ. Шу билан бирга, Хаависто Финляндия аъзоликка ариза бериш учун ҳеч қандай олд шартлар қўймаганини эслатди.

Хаависто, шунингдек, Финляндия Швеция билан бир вақтда альянсга аъзо бўлишини айтди. У икки давлатнинг бир вақтда блокка қўшилиши ҳарбий зарурат эканини қайд этди.

Хаавистонинг баёнотлари «Халқ ва мудофаа» конференциясида янгради. Бу анжуманда НАТО раҳбари Йенс Столтенберг ва Швеция бош вазири Улф Кристерссон ҳам иштирок этди.

Швеция Финляндия билан биргаликда НАТОга аъзо бўлиш учун ариза берганди, бироқ уларнинг альянсга қўшилиш жараёни Туркия ва Венгрия томонидан блокланди. НАТОга аъзо бўлиш учун НАТО аъзоларининг барчасидан розилик керак. Туркия расмийларининг асосий талаби Анқарада террорчи деб топилган фуқароларни, биринчи навбатда Курдистон Ишчилар партиясини экстрадиция қилиш бўлди.