Shvetsiya va Finlyandiya 2023-yil oxirigacha NATOga a’zo bo‘ladi. Bu haqda Shimoliy Atlantika alyansi bosh kotibi Yens Stoltenberg ma’lum qildi.
U ratifikatsiya jarayoni o‘z vaqtida yakunlanishiga mutlaqo ishonishini qo‘shimcha qildi.
Shu bilan birga, NATO bosh kotibi aniq sanalarni aytmadi, biroq uning fikricha, Turkiya jarayonga uzoq vaqt to‘sqinlik qilmaydi va bu ikki mamlakatning NATOga qo‘shilish protokollarini ratifikatsiya qiladi.
Shvetsiya Tashqi ishlar vaziri Tobias Billstryom 21—22-dekabr kunlari Anqaraga tashrif buyurib, Turkiya tashqi ishlar vaziri Mevlut Chavusho‘g‘li bilan uchrashgandi.
Eslatib o‘tamiz, 19-dekabr kuni Shvetsiya Oliy sudi jurnalist Bulent Kenesning Turkiyaga ekstraditsiyasini to‘xtatgan. Chavusho‘g‘li bu qarorni “o‘ta salbiy” deb atagan.
Jurnalist va Kurd ishchilar partiyasiga aloqador shaxslarning ekstraditsiya qilinishi Shvetsiyaning NATOga a’zo bo‘lishini tasdiqlash bo‘yicha Turkiya talablaridan biri. Chavusho‘g‘li Billstryom bilan o‘tkazgan matbuot anjumanida “Shvetsiya kelishuvlarning hali yarmini ham amalga oshirmagan”ini aytdi.
Noyabr oyida Turkiya prezidenti Rajab Toyyib Erdo‘g‘on uning mamlakati Finlyandiya va Shvetsiyaning NATOga rasmiy a’zo bo‘lishini ikki davlatdan zarur “qadamlar”ni ko‘rmaguncha ma’qullamasligini aytgan edi.
Finlyandiya va Shvetsiya NATOga qo‘shilish uchun qachon ariza bergan?
18-may kuni Finlyandiya va Shvetsiya Ukrainadagi jangovar harakatlar avj olgan bir paytda NATOga qo‘shilish uchun ariza bergan. Turkiya Xelsinki va Stokgolmni mamlakatda taqiqlangan Kurdiston Ishchilar partiyasi bilan hamkorlikda ayblab, ularning alyansga qo‘shilishga bir muddat to‘sqinlik qildi.
Shvetsiya va Finlyandiya NATO blokiga qo‘shilishi uchun alyansga a’zo bo‘lgan 30 ta mamlakatning barchasi tegishli bitimni ratifikatsiya qilishi kerak.
Shvetsiya va Finlyandiyaning NATOga a’zo bo‘lishini ratifikatsiya qilish jarayoni 5-iyul kuni boshlangan. Ularning NATOga qo‘shilishini alyansning 30 ta a’zosidan 28 tasi ratifikatsiya qildi.
Izoh (0)