Chechenistondan 300 ga yaqin OMON jangchilari Ukrainadagi “maxsus harbiy operatsiya” zonasiga jo‘nab ketdi, deb xabar berdi respublika rahbari Ramzan Qodirov o‘zining Telegram-kanalida.
“Bugun Rossiya qahramoni Ahmat hoji Qodirov nomidagi Grozniy xalqaro aeroportidan Checheniston Respublikasi Milliy gvardiyasining ‘AHmat-1’ OMON bo‘linmasidan 300 ga yaqin jangchi frontda oldingi chiziqdagi birodarlariga yordam berish uchun jo‘nab ketdi”, — deb yozadi hudud rahbari.
Qodirov jangchilarni yo‘lda respublika parlamenti raisi Magomed Daudov, bosh vazir o‘rinbosari Abuzayd Vismurodov va Milliy gvardiya qo‘shinlarining Checheniston bo‘yicha federal xizmati rahbari Sharip Delimxonov kuzatib borayotganini ta’kidladi. Ular “omonchilar”ga “yovuzlikka qarshi kurashda muvaffaqiyat va tez orada g‘olib bo‘lib uyga qaytishni” tilagan.
Dekabr oyi oxirida Qodirov Ukrainada “Qasos” nomli alohida maxsus harbiy operatsiyasining ikkinchi bosqichiga tayyorgarlik ko‘rilayotganini aytgandi. Birinchi bosqich oktabr oyining oxirida bo‘lib o‘tgan. “Operatsiyaning ikkinchi qismi shafqatsizroq bo‘ladi”, — deydi Checheniston rahbari.
Qodirovning da’vo qilishicha, birinchi bosqichda Nikolayev-Krivoy Rog yo‘nalishida 657 nafar ukrainalik jangchi yo‘q qilingan, 300 nafari yaralangan, 40 ta maxsus harbiy texnika ishdan chiqarilgan.
Izoh (0)