Xitoyda oxirgi oylarda Tesla elektromobillarini sotib olgan bir necha yuzlab mijozlar mamlakatning turli shaharlaridagi Tesla avtosalonlari va do‘konlarida norozilik namoyishlari o‘tkazdi, deb xabar bermoqda Reuters.
Namoyishchilar 6-yanvar kuni kompaniya kutilmaganda elektromobillari narxini so‘nggi uch oy ichida ikkinchi marta pasaytirganiga norozilik bildirgan. Narxlar 2022-yilning sentabriga nisbatan 13-24 foizga arzonlashgan. Namoyishchilar yangi narxlarning pasayishi ular 2022-yilning so‘nggi oylarida olgan avtomobillari uchun ortiqcha pul to‘laganidan dalolat berishini ta’kidlamoqda.
Xitoy ijtimoiy tarmoqlarida joylashtirilgan videolarga ko‘ra, 7-yanvar kuni Shanxaydagi Tesla yetkazib berish markazi oldida 200 ga yaqin odam to‘plangan. Shuningdek, Xitoyning markaziy qismidagi Chendudan janubdagi Shenchjengacha bo‘lgan shaharlarda kompaniyaning do‘konlari va yetkazib berish markazlarida ham olomon norozilik namoyishlari o‘tkazgan. Guvohlar olgan videolarda Tesla maydonlariga ko‘plab politsiya xodimlari kelganini ko‘rish mumkin.
Tesla China vakilining Reuters agentligiga ma’lum qilishicha, kompaniya narxlar pasayishidan oldin elektromobil olgan mijozlarga kompensatsiya to‘lashni rejalashtirmayapti.
Izoh (0)