Ukraina Mudofaa vazirligi Rossiya 9 yillik urush davomida sulhni necha marta buzganini ma’lum qildi

Rossiya to‘qqiz yillik urush davomida hech qachon sulh bitimlariga rioya qilmagan. Bu haqda Ukraina mudofaa vaziri o‘rinbosari Anna Malyar ma’lum qildi.

Mudofaa rasmiysining ta’kidlashicha, ATO (“Antiterror operatsiyasi” — Ukrainada 2014—2018-yillarda Donbassdagi urushning rasmiy nomi) davridagi janglar davomida o‘t ochishni to‘xtatishga 11 marta urinish bo‘lgan. Bu jarayon uch tomonlama aloqa guruhi doirasida kelishib olingan. Biroq barcha “sulhlar” Rossiyaning “qasddan qilgan harakatlari” bilan tugagan.

“Masalan, 2018-yildagi ‘bahorgi sulh’da Rossiya 22 kunlik e’lon qilingan ‘sukunat’ davrida kamida 153 ta hujum uyushtirgan, oqibatda olti nafar ukrainalik harbiy xizmatchi halok bo‘lib, 12 nafari yaralangan”, — deydi Malyar.

Ukraina bir necha bor ikki tomonlama o‘t ochishni to‘xtatish to‘g‘risida kelishib olgan, biroq uning natijalari avvalgilaridek bo‘lgan.

“2019-yilda Ukraina armiyasining Donbassdagi yo‘qotishlari 97 kishini tashkil etgan. 2020-yildagi iyul sulhi boshlanishidan oldin Ukraina qurolli kuchlarining yana 32 nafar harbiy xizmatchisi halok bo‘lgan, 220 nafari yaralangan”, — deydi rasmiy.

Uning so‘zlariga ko‘ra, 2020-yil 27-iyulda yana bir “to‘liq va keng qamrovli o‘t ochishni to‘xtatish rejimi” rasman boshlangan, biroq u atigi yarim soat davom etgan. Xususan, taxminan soat 00:20 da Rossiya Ukraina dengiz piyodalari brigadasi bo‘linmalarini o‘qqa tutgan va ertalab soat 9 larda yana bir o‘t ochish qayd etilgan.

“Nihoyat 2020-yilning 27-iyulidan 2021-yilning 27-iyuliga qadar dushmanning 2 000 dan ortiq hujumi qayd etildi. Shu bois Rossiya qo‘shinlarining Ukraina hududidan olib chiqib ketilishigina haqiqiy o‘t ochishni to‘xtatish va agressiyaga chek qo‘yishni anglatadi”, — dedi Ukraina mudofaa vaziri o‘rinbosari.

Rojdestvo sulhi

5-yanvar kuni Rossiya prezidenti Vladimir Putin mudofaa vaziri Sergey Shoyguga 6-yanvar soat 12:00 dan 7-yanvar soat 00:00 ga qadar “butun front chizig‘i bo‘ylab o‘t ochishni to‘xtatish rejimini” joriy etish bo‘yicha topshiriq berdi. Kreml Ukrainani ham shunday qilishga chaqirdi.

Ukraina prezidenti Vladimir Zelenskiy Rossiya Rojdestvo bayramini niqob qilib, rus harbiylariga jihozlar, o‘q-dorilar yetkazib berish, safarbarlarni pozitsiyalarga yaqinlashtirishni ko‘zlaganini aytdi. Prezident ofisi rahbari maslahatchisi Mixail Podolyak Rossiya taklifini ikkiyuzlamachilik deb atadi. U sulhga rozi bo‘lish uchun Rossiya bajarishi kerak bo‘lgan ikkita shartni aytdi.

Ukraina Milliy xavfsizlik va mudofaa kengashi kotibi Aleksey Danilov ham sulh bo‘yicha o‘z fikrini bildirdi. U Rossiya bilan “Rojdestvo sulh”i bo‘yicha hech qanday muzokara olib borilmasligi, “tajovuzkor davlat” Ukraina hududini tark etishi kerakligini aytdi.