Putin Qrim hududidan yadroviy provokatsiyalar uchun foydalanmoqchi — Ukraina razvedkasi
Rossiya Qrim hududida quruqlik, havo va dengizdagi yadroviy qurol tashuvchilarni joylashtirdi, Vladimir Putin yarim orol hududini Ukrainaga qarshi yadroviy provokatsiyalar uchun tramplin deb hisoblaydi. Bu haqda Ukraina Mudofaa vazirligi razvedka bosh boshqarmasi vakili Andrey Yusov ma’lum qildi.
Ukraina Mudofaa vazirligi Qrim va Belarusdan yadroviy provokatsiya xavfini istisno qilmaydi, vaziyat razvedka tomonidan kuzatilmoqda. Shuning uchun bu borada tasodifan kutilmalar bo‘lmasligi ta’kidlangan.
“Yadroviy tahdid Rossiya va Putin rejimini yakuniy nuqtaga olib keladi. Ma’lumotlarga ko‘ra, bosib olingan Qrim ham, Belarus ham Putin tomonidan yadroviy provokatsiyalar uchun ko‘rib chiqilmoqda”, — dedi Yusov.
Putinning 2023-yildagi harbiy-siyosiy maqsadlariga baho berar ekan, Yusov, birinchi navbatda, Lugansk va Donetsk viloyatlarining butun hududini bosib olish, shuningdek, Qrim quruqlik yo‘lagini saqlab qolish ekanini aytdi.
“Ushbu vazifalarni amalga oshirish uchun Rossiya mudofaa kuchlarini boshqa yo‘nalishlarda, shu jumladan Belarusdan provokatsiyalar bilan chalg‘itishi mumkin”, — deydi razvedkachi.
Rossiya bosib olingan hududlarni saqlab qolish uchun Qrim shimoliga yangi harbiy qismlar joylashtirmoqda. Ukraina razvedkasi Rossiya Qrim yo‘nalishidagi quruqlik yo‘lagini saqlab qolish uchun barcha sa’y-harakatlarini amalga oshirayotganini aytgan. Rossiya yarim orolda quruqlik, havo va dengizdagi yadroviy qurol tashuvchilarni saqlamoqda. Uning so‘zlariga ko‘ra, Rossiya harbiylari Krasnokamenka posyolkasidagi “Feodosiya-13” inshootida yadro qurolini saqlashga tayyorlash maqsadida ma’lum ishlarni amalga oshirgan, biroq hozircha bu yakunlangani ma’lum emas.
