Украина Мудофаа вазирлиги Россия 9 йиллик уруш давомида сулҳни неча марта бузганини маълум қилди

Россия тўққиз йиллик уруш давомида ҳеч қачон сулҳ битимларига риоя қилмаган. Бу ҳақда Украина мудофаа вазири ўринбосари Анна Маляр маълум қилди.

Мудофаа расмийсининг таъкидлашича, АТО («Антитеррор операцияси» — Украинада 2014—2018 йилларда Донбассдаги урушнинг расмий номи) давридаги жанглар давомида ўт очишни тўхтатишга 11 марта уриниш бўлган. Бу жараён уч томонлама алоқа гуруҳи доирасида келишиб олинган. Бироқ барча «сулҳлар» Россиянинг «қасддан қилган ҳаракатлари» билан тугаган.

«Масалан, 2018 йилдаги ‘баҳорги сулҳ’да Россия 22 кунлик эълон қилинган ‘сукунат’ даврида камида 153 та ҳужум уюштирган, оқибатда олти нафар украиналик ҳарбий хизматчи ҳалок бўлиб, 12 нафари яраланган», — дейди Маляр.

Украина бир неча бор икки томонлама ўт очишни тўхтатиш тўғрисида келишиб олган, бироқ унинг натижалари аввалгиларидек бўлган.

«2019 йилда Украина армиясининг Донбассдаги йўқотишлари 97 кишини ташкил этган. 2020 йилдаги июль сулҳи бошланишидан олдин Украина қуролли кучларининг яна 32 нафар ҳарбий хизматчиси ҳалок бўлган, 220 нафари яраланган», — дейди расмий.

Унинг сўзларига кўра, 2020 йил 27 июлда яна бир «тўлиқ ва кенг қамровли ўт очишни тўхтатиш режими» расман бошланган, бироқ у атиги ярим соат давом этган. Хусусан, тахминан соат 00:20 да Россия Украина денгиз пиёдалари бригадаси бўлинмаларини ўққа тутган ва эрталаб соат 9 ларда яна бир ўт очиш қайд этилган.

«Ниҳоят 2020 йилнинг 27 июлидан 2021 йилнинг 27 июлига қадар душманнинг 2 000 дан ортиқ ҳужуми қайд этилди. Шу боис Россия қўшинларининг Украина ҳудудидан олиб чиқиб кетилишигина ҳақиқий ўт очишни тўхтатиш ва агрессияга чек қўйишни англатади», — деди Украина мудофаа вазири ўринбосари.

Рождество сулҳи

5 январь куни Россия президенти Владимир Путин мудофаа вазири Сергей Шойгуга 6 январь соат 12:00 дан 7 январь соат 00:00 га қадар «бутун фронт чизиғи бўйлаб ўт очишни тўхтатиш режимини» жорий этиш бўйича топшириқ берди. Кремль Украинани ҳам шундай қилишга чақирди.

Украина президенти Владимир Зеленский Россия Рождество байрамини ниқоб қилиб, рус ҳарбийларига жиҳозлар, ўқ-дорилар етказиб бериш, сафарбарларни позицияларга яқинлаштиришни кўзлаганини айтди. Президент офиси раҳбари маслаҳатчиси Михаил Подоляк Россия таклифини иккиюзламачилик деб атади. У сулҳга рози бўлиш учун Россия бажариши керак бўлган иккита шартни айтди.

Украина Миллий хавфсизлик ва мудофаа кенгаши котиби Алексей Данилов ҳам сулҳ бўйича ўз фикрини билдирди. У Россия билан «Рождество сулҳ»и бўйича ҳеч қандай музокара олиб борилмаслиги, «тажовузкор давлат» Украина ҳудудини тарк этиши кераклигини айтди.