Isroil hukumati G‘azo sektori bilan chegarada beton panjara o‘rnatishga kirishdi. Bu haqda Isroil mudofaa kuchlariga tayanib, Times of Israel xabar berdi.
Mudofaa vazirligiga ko‘ra, chegaraga yaqin aholi punktlari xavfsizligini ta’minlash maqsadida shunday chora ko‘rilmoqda. 4-yanvar kuni panjara o‘rnatilishi birinchi tosh qo‘yish marosimi bo‘lib o‘tgan. Devorning umumiy uzunligi 4,6 kilometrni tashkil qiladi. Harbiylarga ko‘ra, u ikkita magistral bo‘ylab quriladi.
Qurilish hududida mahalliy aholiga qulaylik yaratish maqsadida velosiped yo‘llari ham yotqiziladi. Loyiha “Xavfsiz yo‘l” deb nomlandi. Qurilish 2023-yil yozda yakunlanishi kutilmoqda, unga qancha mablag‘ sarflanishi oshkor qilinmagan. The Times of Israel nashriga ko‘ra, to‘siqdan asosiy maqsad G’azo sektori tomonidan uchirilgan tankka qarshi raketalardan himoya qilish hisoblanadi.
Eslatib o‘tamiz, 3-yanvar kuni Isroil milliy xavfsizlik vaziri Itamar Ben-Gvir Sharqiy Quddusdagi Al-Aqso masjidiga bordi, bu AQSH, Falastin va bir qancha arab davlatlari, jumladan, Isroil bilan tinchlik shartnomasini imzolagan davlatlar tomonidan qoralandi.
Falastin Tashqi ishlar vazirligi “ekstremist vazir Ben-Gvir tomonidan Al-Aqso masjidiga bostirib kirishni keskin qoraladi va buni misli ko‘rilmagan provokatsiya, mojaroning xavfli avj olishi” deb baholadi. Isroil bilan tinchlik shartnomasiga ega bo‘lgan Iordaniya, Misr va Birlashgan Arab Amirliklari Ben-Gvirning Al-Aqsonga “bosqin” qilganini qoraladi.
Izoh (0)