Stoltenberg qurol tinchlikka olib boruvchi yo‘l ekanini aytdi

NATO bosh kotibi Yens Stoltenberg Ukrainaga qurol-yarog‘ yetkazib berilishi mamlakatda nizo tugatilib, tinchlik o‘rnatilishiga olib kelishini aytdi. Bu haqda u Norvegiya korxonalari konfederatsiyasining yillik anjumanida ma’lum qildi.

“Agar biz muzokaralar orqali tinch yo‘l bilan yechimga erishib, Ukraina Yevropadagi mustaqil demokratik mamlakat sifatida saqlanib qolishini istasak, bunga yetishishning eng tezkor usuli — Ukrainani qo‘llab-quvvatlash. Qurol — bu, mohiyatan, tinchlikka olib boruvchi yo‘l”, — dedi Stoltenberg.

Uning aniqlik kiritishicha, “Moskvadagi rejim boshqacha Yevropani ko‘rishni xohlayapti” — Rossiya qo‘shni mamlakatlarni nazorat qilishga intilmoqda va “demokratiya va erkinlikda tahdidni ko‘rmoqda”, bu esa davlatni G‘arbning doimiy raqibiga aylantirmoqda. “Shunday ekan, hatto bu urush tugasa ham, bizning Rossiya bilan munosabatlarimizdagi muammolar qoladi”, — dedi Stoltenberg.

Rossiya Xavfsizlik kengashi raisi o‘rinbosari Dmitriy Medvedev Stoltenbergning bayonotiga britaniyalik yozuvchi Jorj Oruellning “1984” antiutopik romanidan iqtibos keltirish orqali munosabat bildirdi. “Shu ahvolgacha yetib keldik! Stoltenberg qurol — mohiyatan tinchlikka yo‘l, dedi. Axir ‘o‘tmish o‘chirib tashlandi, o‘chirilgan narsalar unutildi, yolg‘on esa haqiqatga aylandi’”, — deb yozdi Medvedev o‘z Twitter’ida.

Rossiya tomoni G‘arb mamlakatlari tomonidan Ukrainaga qurol-yarog‘ yetkaziliayotganini tanqid qiladi. Kreml aytishicha, bunday xatti-harakatlar Moskvaga Ukrainada o‘z maqsadlariga erishishda xalal bera olmaydi, balki qurolli nizoni yanada cho‘zib yuboradi, xolos.

Eslatib o‘tamiz, bugun, 6-yanvar kuni AQSH Ukrainaga yangi yordam paketi haqida rasman e’lon qilishi kutilmoqda. Habriy ko‘mak hajmi jami 2,85 milliard dollarga teng bo‘ladi. AP qayd etishicha, ushbu yordam paketi AQSH shu paytgacha Kiyevga taqdim etganlari ichida eng yirigi bo‘ladi. Amerika hukumati uni bahor boshigacha yetkazib bermoqchi, chunki o‘sha paytda jangovar harakatlar yana faol bosqichga o‘tishi kutilmoqda.