5-yanvar kuni AQSH kongressmenlarining spikerni saylash bo‘yicha 11-urinishi ham muvaffaqiyatsiz tugadi va bu 1923-yildagi rekordni yangiladi. O‘shanda spiker 9-urinishda saylangandi, deb xabar beradi CNN.
Respublikachilar partiyasi yetakchisi va asosiy nomzod Kevin Makkarti uning nomzodiga partiyadoshlaridan ba’zilari qarshi chiqqani uchun yana saylanmadi.
Kongressmenlar ketma-ket uch kun ovoz berdi va g‘olib aniqlanmaguncha nomzodlarni ko‘rsatishda davom etmoqchi.
Ayni paytda 6-yanvar tushgacha tanaffus e’lon qilingan. Taxminlarga ko‘ra, bu vaqtda respublikachilar spikerni uzil-kesil saylash va AQSH Vakillar palatasining to‘xtab qolgan ishini davom ettirish uchun partiya ichida murosali yechim topishga harakat qiladi.
1923-yilda ham respublikachilar birinchi urinishda Vakillar palatasi spikerini saylay olmagan. O‘shanda kongressmen Frederik Jillettni saylash uchun to‘qqizta raund kerak bo‘lgan. Undan avval 1859-yilda siyosatchilar Nyu-Jersi shtatidan respublikachi deputat Uilyam Pennington g‘alaba qozongunga qadar 44 marta ovoz bergan.
2022-yil noyabr oyida AQSHda oraliq saylovlar bo‘lib o‘tgandi, uning natijasida respublikachilar Vakillar palatasida 218 ta o‘rinni egallab, uni nazorat qila boshladi. Shundan so‘ng Nensi Pelosining o‘rniga yangi spiker tanlash zarurati yuzaga keldi, chunki Pelosi demokratlar vakili.
Respublikachilar partiyasi endilikda AQSH prezidenti Jo Bayden ma’muriyatining kun tartibiga ta’sir o‘tkazishi mumkin bo‘ladi. Oldingi ikki yilda Kongressning yuqori va quyi palatalarini nazorat qilgan demokratlar respublikachilarning roziligisiz ham istalgan qonun loyihasini qabul qila olgan.
Izoh (0)