AQSHda 2021-yilning yanvarida Kongress binosiga qilingan hujum oqibatida halok bo‘lgan politsiya zobiti Brayan Siknikning qallig‘i Sandra Gartsa Donald Tramp va ikki namoyishchi ustidan sudga murojaat qildi. Bu haqda The Hill xabar berdi.
Gartsaning da’vosiga ko‘ra, politsiyachining o‘limi uchun Tramp va ikki namoyishchi — Julina Kxater va Jorj Tanios “bevosita va bilvosita” javobgar.
Sud jarayonida aytilishicha, sudlanuvchilarning xatti-harakatlari Brayan Siknikning o‘limiga sabab bo‘lgan klinik holatga olib kelgan. 6-yanvar kungi voqealarda u ikki marta yurak xurujiga uchragan, shundan so‘ng, 7-yanvar kuni kasalxonada vafot etgan.
Ma’lumot uchun 2021-yil 6-yanvar kuni AQSH Kongressi a’zolari Donald Trampning prezidentlik saylovlarida mag‘lub bo‘lganini tasdiqlash uchun yig‘ilgan vaqtda Trampning tarafdorlari Kongressga bostirib kirgan. Politsiya bir necha soat o‘tibgina namoyishchilarni Kapitoliydan haydab chiqarishga muvaffaq bo‘lgan. Huquq-tartibot organlari xodimlari o‘qotar qurol, dubinka, ko‘zdan yosh oqizuvchi gazdan foydalangan. Hodisada Kapitoliy xavfsizlik xodimi bilan birgalikda, besh kishi halok bo‘lgan, 140 nafar politsiyachi yaralangan.
Hujum oldidan Tramp 2020-yilgi saylov natijalarini tan olishdan ochiqchasiga bosh tortgan va ovoz berish jarayonida ko‘plab qonunbuzarliklarga yo‘l qo‘yilganini ta’kidlab, saylov natijalarini qayta ko‘rib chiqishni talab qilgandi.
Keyinroq Trampning o‘zi Kapitoliyga hujumni qoralab chiqdi.
2022-yilning dekabr oyida AQSH Kongressi Vakillar palatasining Kapitoliyga hujumni tergov qilish bo‘yicha saylovchi qo‘mitasi Donald Trampga nisbatan jinoiy ish qo‘zg‘atishni tavsiya qildi.
Qo‘mita fikricha, Trampga qurolli isyon, yolg‘on guvohlik berish uchun, federal hukumatga nisbatan firibgarlik va rasmiy jarayonga to‘sqinlik qilish uchun til biriktirish bo‘yicha ayblovlar qo‘yilishi kerak.
Izoh (0)