Fransiyaning Tehrondagi elchisi Charlie Hebdo jurnalida Eron diniy hukumati haqida karikaturalar e’lon qilingani munosabati bilan mamlakat Tashqi ishlar vazirligiga chaqirildi, deb xabar beradi Tasnim agentligi.
“Eron nufuzli kishilarini, muqaddas qadamjolarini, diniy va milliy qadriyatlarini haqorat qilgan Fransiya nashrining kamsituvchi xatti-harakatlaridan keyin, Fransiyaning Tehrondagi elchisi bugun (4-yanvar) kechqurun mahalliy tashqi ishlar vazirligiga chaqirildi”, — dedi Eron tashqi ishlar vaziri Husayn Amir Abdullohiyon.
Uning so‘zlariga ko‘ra, Charlie Hebdo’ning “haqoratli va nomunosib” harakatlari qat’iy javobsiz qolmaydi.
Bayonot Eronda bo‘lib o‘tayotgan va Fransiya tomonidan qo‘llab-quvvatlanayotgan katta ko‘lamli norozilik namoyishlari fonida berildi.
Ma’lum bo‘lishicha, Fransiya haftalik jurnali Erondagi hukumatga qarshi namoyishlarni qo‘llab-quvvatlab tashkil qilingan tanlov doirasida Eron oliy yetakchisi Ali Homeyniyga atalgan o‘nlab karikaturalarni chop etgan. Jurnal vakillari so‘zlariga ko‘ra, tanlov “o‘z erkinliklari uchun kurashayotgan eronliklarni ushbu kurashda qo‘llab-quvvatlash”ga qaratilgan.
Eronda 17-sentabrdan beri davom etayotgan namoyishlarda 400 000 ga yaqin odam hibsga olindi. Sentabr oyining oxirida Eronda 22 yoshli Mahsa Amini hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlandi. Ular butun mamlakat bo‘ylab haligacha davom etmoqda. Namoyishlar kuch tuzilmalari tomonidan shafqatsizlik bilan bostirilmoqda.
Tartibsizliklar chog‘ida xavfsizlik xodimlari tomonidan 450 dan ortiq odam o‘ldirilgan.
Izoh (0)