Франциянинг Теҳрондаги элчиси Charlie Hebdo журналида Эрон диний ҳукумати ҳақида карикатуралар эълон қилингани муносабати билан мамлакат Ташқи ишлар вазирлигига чақирилди, деб хабар беради Tasnim агентлиги.
«Эрон нуфузли кишиларини, муқаддас қадамжоларини, диний ва миллий қадриятларини ҳақорат қилган Франция нашрининг камситувчи хатти-ҳаракатларидан кейин, Франциянинг Теҳрондаги элчиси бугун (4 январь) кечқурун маҳаллий ташқи ишлар вазирлигига чақирилди», — деди Эрон ташқи ишлар вазири Ҳусайн Амир Абдуллоҳиён.
Унинг сўзларига кўра, Charlie Hebdo’нинг «ҳақоратли ва номуносиб» ҳаракатлари қатъий жавобсиз қолмайди.
Баёнот Эронда бўлиб ўтаётган ва Франция томонидан қўллаб-қувватланаётган катта кўламли норозилик намойишлари фонида берилди.
Маълум бўлишича, Франция ҳафталик журнали Эрондаги ҳукуматга қарши намойишларни қўллаб-қувватлаб ташкил қилинган танлов доирасида Эрон олий етакчиси Али Homeйнийга аталган ўнлаб карикатураларни чоп этган. Журнал вакиллари сўзларига кўра, танлов «ўз эркинликлари учун курашаётган эронликларни ушбу курашда қўллаб-қувватлаш»га қаратилган.
Эронда 17 сентябрдан бери давом этаётган намойишларда 400 000 га яқин одам ҳибсга олинди. Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Тартибсизликлар чоғида хавфсизлик ходимлари томонидан 450 дан ортиқ одам ўлдирилган.
Изоҳ (0)