Jahon banki iqlim o‘zgarishi va boshqa global inqirozlarni bartaraf etish uchun kreditlash imkoniyatlarini sezilarli darajada kengaytirish niyatida. Bu haqda bank tomonidan ishlab chiqilgan rivojlanish “yo‘l xaritasi”ga tayanib, Reuters xabar bermoqda.
Unga ko‘ra, Jahon banki kapitalni ko‘paytirish va yangi kreditlash vositalarini ko‘rib chiqmoqda.
Hujjat allaqachon aksiyadorlarga yuborilgan. Bank rahbariyati oktabr oyida bank va Xalqaro valyuta jamg‘armasining qo‘shma rivojlanish qo‘mitasi tomonidan tasdiqlash uchun uning missiyasi, faoliyat modeli va moliyaviy imkoniyatlarini o‘zgartirish bo‘yicha aniq takliflar tayyorlamoqchi.
“Yo‘l xaritasi”ga ko‘ra, Jahon banki kapitalni ko‘paytirish orqali mamlakatlarga ko‘proq kreditlar berishi va kreditlash limitlarini oshirishi mumkin.
Shuningdek, yangi moliyalashtirish vositalari, xususan, xususiy sektorga beriladigan kreditlar uchun kafolatlar ko‘rib chiqilmoqda.
Shu bilan birga, hujjatda iqlim o‘zgarishi, sog‘liqni saqlash, oziq-ovqat xavfsizligi va boshqa muammolarni hal qilish uchun ajratiladigan kreditlarning ko‘payishi Xalqaro tiklanish va taraqqiyot banki (XTTB) kapitalini oshirishni talab qilishi mumkinligi haqida ogohlantiriladi.
2018-yilda uning kapitali 13 milliard dollarga oshirilgan edi. Ammo bu mablag‘lar, “Yo‘l xaritasi”da qayd etilganidek, “ko‘p emas, o‘n yil ichida bir inqirozga tayyorgarlik ko‘rish uchun mo‘ljallangan edi”, shuning uchun XTTBning zaxiralari 2023-yilning o‘rtalarida tugashi mumkin.
Jahon banki hisob-kitoblariga ko‘ra, 2022-yilda Yevropa va Markaziy Osiyo mamlakatlari iqtisodiyoti Rossiya, Ukraina, Belarus va Moldova yalpi ichki mahsuloti pasayganidan keyin 0,2 foizga qisqardi.
Izoh (0)