Markaziy bank 2022-yilgi bank tizimi samaradorligini tahlil qildi

Markaziy bank boshqaruvining navbatdagi yig‘ilishida Bank nazorati qo‘mitasining 2022-yilgi faoliyati tahlil qilindi. 

Qayd etilishicha, qo‘mita tomonidan joriy yil davomida 88 ta yig‘ilish o‘tkazilgan bo‘lib, ularda ruxsat berish tartiboti bilan bog‘liq 218 ta va kredit tashkilotlarining moliyaviy holatiga doir 82 ta masala o‘rganib chiqilgan.

Bundan tashqari, normativlarga rioya etilmagani, moliyaviy yo‘qotishlarga qarshi zaxiralar yaratilmagani, moliyaviy holati to‘lovga qobiliyatsiz bo‘lganligi, hisobot ma’lumotlarini buzib ko‘rsatish orqali Markaziy bankka haqqoniy bo‘lmagan ma’lumotlar taqdim qilib kelinganligi sababli, “Turkistonbank” va Hi-Tech Bank’lardan bank faoliyatini amalga oshirish huquqini beruvchi litsenziya chaqirib olindi. 

Qonunchilikda belgilangan muddatlarda o‘z faoliyatini boshlamagani uchun 3 ta (“International Eco Pay”, “Panda internet technology”, “Ugnis”) to‘lov tashkilotlaridan ham litsenziyalar chaqirib olingan.

Ta’kidlanishicha, qo‘mita bundan keyin ham bank tizimi barqarorligini saqlab turish, omonatchilar va kreditorlar manfaatlari himoya qilinishini ta’minlash bilan birga, xalqaro standartlarga muvofiq bank tizimini tartibga solish va nazorat qilishning huquqiy asoslarini yanada takomillashtirish kabi masalalarga e’tibor qaratadi.