Жаҳон банки иқлим ўзгариши ва бошқа глобал инқирозларни бартараф этиш учун кредитлаш имкониятларини сезиларли даражада кенгайтириш ниятида. Бу ҳақда банк томонидан ишлаб чиқилган ривожланиш «йўл харитаси»га таяниб, Reuters хабар бермоқда.
Унга кўра, Жаҳон банки капитални кўпайтириш ва янги кредитлаш воситаларини кўриб чиқмоқда.
Ҳужжат аллақачон акциядорларга юборилган. Банк раҳбарияти октябрь ойида банк ва Халқаро валюта жамғармасининг қўшма ривожланиш қўмитаси томонидан тасдиқлаш учун унинг миссияси, фаолият модели ва молиявий имкониятларини ўзгартириш бўйича аниқ таклифлар тайёрламоқчи.
«Йўл харитаси»га кўра, Жаҳон банки капитални кўпайтириш орқали мамлакатларга кўпроқ кредитлар бериши ва кредитлаш лимитларини ошириши мумкин.
Шунингдек, янги молиялаштириш воситалари, хусусан, хусусий секторга бериладиган кредитлар учун кафолатлар кўриб чиқилмоқда.
Шу билан бирга, ҳужжатда иқлим ўзгариши, соғлиқни сақлаш, озиқ-овқат хавфсизлиги ва бошқа муаммоларни ҳал қилиш учун ажратиладиган кредитларнинг кўпайиши Халқаро тикланиш ва тараққиёт банки (ХТТБ) капиталини оширишни талаб қилиши мумкинлиги ҳақида огоҳлантирилади.
2018 йилда унинг капитали 13 миллиард долларга оширилган эди. Аммо бу маблағлар, «Йўл харитаси»да қайд этилганидек, «кўп эмас, ўн йил ичида бир инқирозга тайёргарлик кўриш учун мўлжалланган эди», шунинг учун ХТТБнинг захиралари 2023 йилнинг ўрталарида тугаши мумкин.
Жаҳон банки ҳисоб-китобларига кўра, 2022 йилда Европа ва Марказий Осиё мамлакатлари иқтисодиёти Россия, Украина, Беларусь ва Молдова ялпи ички маҳсулоти пасайганидан кейин 0,2 фоизга қисқарди.
Изоҳ (0)