AQSHning yetakchi banklari investitsiya banki va savdo operatsiyalaridan tushgan past daromadlar tufayli xodimlar uchun yillik bonuslarni qisqartirishga majbur. Bu haqda The Wall Street Journal nashri yozmoqda.
Daromadning pasayishi fond bozoridagi umumiy pasayish, aksiyalar va obligatsiyalarning yangi joylashtirilishi fonida yuz berdi.
Hisob-kitoblarga ko‘ra, eng yirik banklarning qimmatli qog‘ozlarni joylashtirish to‘lovlari hamda qo‘shilish va qo‘shib olish bo‘yicha vositachilik xizmatlaridan tushgan umumiy daromadi yil davomida taxminan 50 milliard dollarga kamaydi.
Banklardagi manbalarga tayanib, WSJ xabar berishicha, JP Morgan Chase, Bank of America, Citigroup va Jefferies Financial Group xodimlar uchun bonus pulini 30 foizga, Goldman Sachs investitsiya banki esa 40 foizga kamaytirdi.
Goldman Sachs rahbari Devid Solomon, shuningdek, daromadlarning pasayishi fonida bank kelasi yilning boshida ishchi kuchini qisqartirishi mumkinligini aytdi.
AQSH OAV manbalarining tahmin qilishicha, qisqartirish investitsiya banki xodimlarining 8 foiziga yoki 4 mingga yaqin xodimiga ta’sir qilishi mumkin.
AQSHda bu yil yirik banklar xodimlari uchun qancha bonus berilishi haqida ma’lumot yo‘q. O‘tgan yili Nyu-York shtat buxgalteriya boshqarmasi AQSHning yirik banklarida qimmatli qog‘ozlar sohasida ishlaydigan xodimlar uchun o‘rtacha yillik mukofot rekord darajadagi 257 500 dollarni tashkil etganini ma’lum qilgandi.
Izoh (0)