O‘zbekiston qonunchiligida 2023-yildan boshlab bir qator o‘zgarish va yangiliklar kuchga kiradi. “Daryo” quyida yangi yildan kuchga kiradigan milliy qonunchilikdagi asosiy o‘zgarishlarni taqdim etadi.
Fuqaroni tekshirish uchun IIB bo‘limiga olib borish amaliyotidan voz kechiladi
2023-yil 1-yanvardan boshlab ichki ishlar organlarida bosqichma-bosqich “E-patrul” tizimi joriy etilib, tekshirish uchun fuqaroni ichki ishlar bo‘limiga olib borish amaliyotidan voz kechiladi. Bunda barcha ma’lumotlar joyida planshet orqali tekshirilib, patrul-post xizmati xodimlari faoliyati bodikameradan foydalangan holda amalga oshirilishi yo‘lga qo‘yiladi.
Qorako‘lchilik mahsulotini yetishtiruvchilar uchun bojxona va soliq imtiyozlari uzaytiriladi
Ipak qurti urug‘i, tut ko‘chatlari va pilla yetishtirish, pillani qayta ishlash va tayyor mahsulotlar ishlab chiqarish bilan shug‘ullanuvchi yuridik shaxslarni mol-mulk va yer solig‘idan ozod etish imtiyozi 2023-yildan 2026-yilga qadar uzaytiriladi. Shuningdek, qorako‘lchilik mahsulotlari ishlab chiqaruvchilari uchun yer solig‘i stavkasini 2018-yilda belgilangan miqdorda saqlab qolish muddati 2026-yilgacha uzaytiriladi.
O‘zbekistonda faxriy donorlarga beriladigan mukofot puli oshiriladi
“O‘zbekiston Respublikasi faxriy donori” ko‘krak nishoni bilan taqdirlangan shaxslarga biryo‘la beriladigan pul mukofoti summasi BHMning 5 baravaridan 15 baravarigacha (1,5 million so‘mdan 4,5 million so‘mgacha) oshiriladi.
Saudiya Arabistoni fuqarolariga vizasiz rejim joriy qilinadi
2023-yil 1-yanvardan boshlab O‘zbekiston hududiga kirgan kundan e’tiboran 30 kunlik muddatga o‘z yoki uchinchi mamlakatga uchish aviachiptasini taqdim qilgan Saudiya Arabistoni fuqarolari uchun vizasiz rejim belgilanadi.
Hokimlarning kadastr organlari ishiga aralashishi taqiqlanadi
2023-yil 1-yanvardan:
- Kadastr agentligining hududiy tuzilmalari faoliyatini tashkil etish Kadastr agentligi tomonidan amalga oshiriladi;
- hududiy boshqarma va bo‘limlar faoliyatini moliyalashtirish respublika budjetidan amalga oshiriladi;
- hududiy bo‘limlar, Davlat kadastrlari palatasi hududiy boshqarmalari va tuman (shahar) filiallarining faoliyatiga hokimlar tomonidan aralashish yoki ta’sir o‘tkazish qat’iy taqiqlanadi.
Subsidiya asosida olingan uy-joy krediti uchun mablag‘lardan daromad solig‘i olinmaydi
2023-yil 1-yanvardan boshlab dastlabki badalning va ipoteka krediti bo‘yicha foizlarning bir qismini qoplash uchun subsidiya berilgan fuqarolarning olingan ipoteka kreditlarini hamda ular bo‘yicha hisoblangan foizlarni to‘lash uchun yo‘naltirilgan ish haqi va boshqa daromadlari JSHDSga tortilmaydi.
Ayrim faoliyat bilan o‘z tomorqasida shug‘ullanganlar rasmiy band bo‘lgan aholi toifasiga kiritiladi
O‘zining shaxsiy tomorqa yer uchastkasida quyidagi faoliyat turlari bilan shug‘ullanayotgan fuqarolar tomonidan yiliga BHMning kamida 1 baravari (300 ming so‘m) miqdorida ijtimoiy soliq to‘langan taqdirda, ular rasmiy band bo‘lgan aholi toifasiga kiritiladi va ushbu davr ularning mehnat stajiga qo‘shiladi:
- chorvachilik (qoramol, qo‘y, echki, ot va boshqalar);
- issiqxona;
- parrandachilik (bedana, kurka, g‘oz, o‘rdak);
- quyonchilik;
- asalarichilik;
- baliqchilik;
- bog‘dorchilik;
- limonchilik;
- gulchilik.
Poyabzal ishlab chiqaruvchilar foyda solig‘idan ozod qilinadi
Charm, mo‘yna xom ashyosi va junni qayta tayyorlash, qoramolni avtomatlashtirilgan tarzda so‘yish, jun, qorako‘l va sun’iy charmdan buyumlar, charm-attorlik mahsulotlari, poyabzal ishlab chiqarish bilan shug‘ullanuvchi soliq to‘lovchilar 2026-yil 1-yanvargacha foyda, aylanmadan olinadigan va mol-mulk solig‘ini to‘lashdan ozod qilinadi.
Toshkentda jamoat transportida yangi moliyalashtirish tizimi joriy etiladi
Toshkent shahrida jamoat transportining yangi tarmog‘i asosida tashkil etiladigan yo‘nalishlarda tashuvchilarni “bosib o‘tilgan yo‘l”, “yo‘lovchi oqimi” va “sifat” mezonlari bo‘yicha bajarilgan ishlar hajmidan kelib chiqqan holda moliyalashtirishning yangi tizimi bosqichma-bosqich joriy etiladi.
Izoh (0)