Oltin narxi iyun oyidan beri birinchi marta troya unsiyasi uchun 1,8 ming dollardan oshdi. Bu haqda “Kommersant” xabar bermoqda.
Birja ma’lumotlariga ko‘ra, savdolar chog‘ida oltin narxi 2022-yil iyunidan beri birinchi marta troya unsiyasi uchun 1 850 dollardan oshdi. O‘zining eng yuqori cho‘qqisida oltin narxi bir unsiya uchun 1 856,6 dollarga yetdi.
Toshkent vaqti bilan 3-yanvar, soat 13:40 ga kelib oltin narxi pasayishni boshladi va 1 844,1 dollardan sotildi. Soat 17:40 ga kelib narx 1 840,2 dollargacha pasaydi.
Bugun, 4-yanvar soat 11:00 ga kelib qimmatbaho metall narxi 1 851,9 dollargacha qayta ko‘tarildi.
Dekabr oyi oxirida Jahon Oltin Kengashi Markaziy banklar oltinni rekord miqdorda sotib olayotgani haqida xabar bergandi. Rasmiy ma’lumotlarga ko‘ra, 2022-yilning uchinchi choragida O‘zbekiston oltin sotib olish bo‘yicha dunyoda ikkinchi o‘rinda.
Sentabrda oltin narxi 2020-yilning aprel oyidan beri eng past darajaga tushgan edi. Shundan keyin uning narxi global dollar kursining pasayishi oqibatida faol ravishda qimmatlay boshladi.
Nisbatan yuqori narxlar sabab noyabr oyida O‘zbekiston yetti oydan beri birinchi marta oltin sotgan edi.
Ayni paytdagi qimmatbaho metallning yuqori narxlari O‘zbekiston Markaziy bankini ko‘proq oltin sotishga undashi mumkin.
Izoh (0)