2022-yilda Markaziy banklarning oltinga bo‘lgan talabi 1967-yildan beri eng ko‘p bo‘lib, 55 yillik ko‘rsatkichlardan ham oshib ketdi. Bu haqda Jahon oltin kengashi (WGC) tahlilchilariga tayanib Financial Times xabar bermoqda.
Tahlilchilarning fikricha, Rossiya va Xitoy asosiy xaridorlarga aylangan. Uchinchi chorakda xaridlar bo‘yicha rasman Turkiya (31 tonna) va O‘zbekiston (26 tonna) yetakchi bo‘ldi.
Rasmiy statistikada Rossiya va Xitoyning yetakchi emasligi ushbu mamlakatlarda oltin sotib olish faqat Markaziy banklar tomonidan amalga oshirilmasligi bilan bog‘liq.
O‘zbekiston Markaziy banki yetti oydan beri faqat oltin sotib olishda faol bo‘ldi va uchinchi chorakda rasman ikkinchi o‘rinda qayd etildi. Biroq noyabr oyida mamlakat mart oyidan beri birinchi marta oltin sotdi.
Nashr oltin sotib olish ko‘payishini mamlakatlarning dollardan voz kechib, zaxiralarni diversifikatsiya qilish istagi bilan izohlagan.
Mutaxassislarning ta’kidlashicha, sotib olingan oltin hajmi bo‘yicha hisob-kitoblar rasmiy ma’lumotlardan sezilarli darajada yuqori, bu esa ishlab chiqaruvchilar o‘rtasida xaridorlarning kimligi va ularning motivlari haqida mish-mishlarga sabab bo‘ladi.
FT’ning yozishicha, WGC’ning konservativ hisob-kitoblari Xalqaro valyuta jamg‘armasi (XVJ) va alohida Markaziy banklar tomonidan bildirilgan xaridlar hajmidan (yil boshidan sentabrgacha 333 tonna) oshib ketgan.
Noyabr oyida rasmiy moliya institutlari 673 tonna oltin sotib olgan bo‘lsa, butun uchinchi chorak davomida Markaziy banklarning o‘zi 399,3 tonna oltin sotib oldi.
Bu 2000-yildan buyon har chorakda statistik ma’lumotlarni yurita boshlaganidan beri rekord ko‘rsatkichdir. Bundan tashqari, bu avvalgi chorakka nisbatan 115 foizga ko‘pdir.
1967-yilda oxirgi marta oltinga bo‘lgan talabning o‘xshash darajasi yuz berganida, jahon valyuta tizimi burilish nuqtasida edi: Yevropa Markaziy banklari Qo‘shma Shtatlardan juda ko‘p oltin sotib olgan, bu esa narxlarning keskin ko‘tarilishiga va oltinning qulashiga olib kelgan.
Izoh (0)