Turkiya, Suriya va Rossiya mudofaa vazirlari Moskvadagi uchrashuvda turk qo‘shinlarini Suriya shimolidan olib chiqib ketish bo‘yicha kelishib oldi. Bu haqda Damashqdagi manbalarga tayanib, El-Watan xabar berdi.
Nashr suhbatdoshiga ko‘ra, Turkiya Suriya hududlaridan qo‘shinlarini to‘liq olib chiqib ketishga roziligini bildirgan. Anqara Suriya suvereniteti va yaxlitligini hurmat qilishini ta’kidlagan. Uchrashuvda 2020-yilda M4 avtomagistralini ochish bo‘yicha tuzilgan shartnomaning bajarilishi ham muhokama qilingan.
Bundan tashqari, muzokarachilar Turkiyada taqiqlangan Kurdiston ishchilar partiyasi tuzilmalari “Isroil va AQSHning agentlari bo‘lib, Turkiya va Suriya uchun katta xavf tug‘dirishi” aytilgani keltiriladi. Erishilgan kelishuv amalga oshirilishini ta’minlash uchun ixtisoslashtirilgan komissiyalar tuzish, zarurat tug‘ilganda yangi uchrashuvlar o‘tkazish rejalashtirilgan.
28-dekabr kuni Moskvada uch davlat harbiy idoralari rahbarlari o‘rtasida muzokaralar bo‘lib o‘tdi. Bu Anqara va Damashq vakillarining so‘nggi 11 yildagi ilk rasmiy uchrashuvi hisoblanadi.
20-noyabrdan beri Turkiya Suriya shimolida taqiqlangan Kurdiston Ishchilar partiyasi qanotiga qarshi havo operatsiyasini o‘tkazmoqda. Prezident Toyib Erdo‘g‘on operatsiyani muvaffaqiyatli deb atagan va uning ortidan quruqlikdagi operatsiya bo‘lishini ta’kidlagan. Shuningdek, u 2023-yilda Turkiya Suriya bilan chegarada 30 kilometrlik xavfsizlik zonasini yaratish uchun barcha zarur choralarni ko‘rishini bildirgan. Noyabr oyi oxirida Erdo‘g‘on “vaqti kelganda” Suriya prezidenti Bashar Asad bilan muzokaralar o‘tkazilishini aytgan, hozirda mamlakatlar o‘rtasidagi aloqalar maxsus xizmatlar darajasida davom etmoqda. Hurriyet gazetasi ikki davlat rahbarlarining uchrashuvi Rossiya prezidenti Vladimir Putin vositachiligida o‘tishi mumkinligini prognoz qilgan.
Izoh (0)