Amerikalik siyosatchi NATO bosh kotibini 30 yilga qamashga chaqirdi

Kentukki gubernatorligiga nomzod, amerikalik siyosatchi Jeffri Yang NATO bosh kotibi Yens Stoltenbergni Ukrainaga qurol yetkazib bergani uchun 30 yilga qamashga chaqirdi. U Twitter’dagi sahifasida bu haqda ma’lum qildi.

“NATO bosh kotibi Yens Stoltenberg — millionlarning qotili va harbiy jinoyatchi, u Gaaga qamoqxonasida bo‘lishi va shartli ravishda 30 yilga ozodlikdan mahrum etilishi kerak”, — deb yozdi siyosatchi tvitida.

30-dekabr kuni Yens Stoltenberg Germaniya va boshqa ittifoqchilarni Ukrainaga qurol yetkazib berishni davom ettirishga chaqirdi.

“Bu paradoksal tuyulishi mumkin, ammo Ukrainani harbiy qo‘llab-quvvatlash tinchlikka erishishning eng tezkor yo‘lidir”, — dedi u. Siyosatchi, Rossiya prezidenti Vladimir Putin Ukraina ustidan nazorat o‘rnatolmasligini tushunishiga ishonch hosil qilish kerakligini ta’kidladi. Bu Ukrainaning mustaqil demokratik davlat sifatida omon qolishini kafolatlaydigan tinchlik kelishuviga yo‘l ochishini aytdi.

Shuningdek, Stoltenberg Ukrainaning Rossiyadagi harbiy nishonlarga uyushtirgan hujumlarini mutlaqo qonuniy deb bilishini ochiq aytdi. “Har bir davlat, jumladan, Ukraina ham o‘zini himoya qilishga haqli”, — dedi siyosatchi.

Uning tushuntirishicha, Ukraina hujumlarini tinch aholini qishda suv, issiqlik va elektr energiyasidan mahrum etishga qaratilgan Rossiyaning Ukraina fuqarolik infratuzilmalariga ommaviy zarbalari kontekstida ko‘rish kerak.