Туркия, Сурия ва Россия мудофаа вазирлари Москвадаги учрашувда турк қўшинларини Сурия шимолидан олиб чиқиб кетиш бўйича келишиб олди. Бу ҳақда Дамашқдаги манбаларга таяниб, El-Watan хабар берди.
Нашр суҳбатдошига кўра, Туркия Сурия ҳудудларидан қўшинларини тўлиқ олиб чиқиб кетишга розилигини билдирган. Анқара Сурия суверенитети ва яхлитлигини ҳурмат қилишини таъкидлаган. Учрашувда 2020 йилда М4 автомагистралини очиш бўйича тузилган шартноманинг бажарилиши ҳам муҳокама қилинган.
Бундан ташқари, музокарачилар Туркияда тақиқланган Курдистон ишчилар партияси тузилмалари «Исроил ва АҚШнинг агентлари бўлиб, Туркия ва Сурия учун катта хавф туғдириши» айтилгани келтирилади. Эришилган келишув амалга оширилишини таъминлаш учун ихтисослаштирилган комиссиялар тузиш, зарурат туғилганда янги учрашувлар ўтказиш режалаштирилган.
28 декабрь куни Москвада уч давлат ҳарбий идоралари раҳбарлари ўртасида музокаралар бўлиб ўтди. Бу Анқара ва Дамашқ вакилларининг сўнгги 11 йилдаги илк расмий учрашуви ҳисобланади.
20 ноябрдан бери Туркия Сурия шимолида тақиқланган Курдистон Ишчилар партияси қанотига қарши ҳаво операциясини ўтказмоқда. Президент Тойиб Эрдўғон операцияни муваффақиятли деб атаган ва унинг ортидан қуруқликдаги операция бўлишини таъкидлаган. Шунингдек, у 2023 йилда Туркия Сурия билан чегарада 30 километрлик хавфсизлик зонасини яратиш учун барча зарур чораларни кўришини билдирган. Ноябрь ойи охирида Эрдўғон «вақти келганда» Сурия президенти Башар Асад билан музокаралар ўтказилишини айтган, ҳозирда мамлакатлар ўртасидаги алоқалар махсус хизматлар даражасида давом этмоқда. Hurriyet газетаси икки давлат раҳбарларининг учрашуви Россия президенти Владимир Путин воситачилигида ўтиши мумкинлигини прогноз қилган.
Изоҳ (0)