Myanma sudi sobiq davlat maslahatchisi va muxolifatdagi “Demokratiya uchun milliy liga” partiyasi rahbari Aun San Su Chjini korrupsiyaga oid beshta jinoyatda ayblanib, jami yetti yillik qamoq jazosiga hukm qildi. Bu haqda Myanmar Now nashri xabar bermoqda.
Aun San Su Chjiga nisbatan jami 19 ta jinoiy ish qo‘zg‘atilgan va hozirda ularning so‘nggi beshtasi bo‘yicha hukm e’lon qilingan, deya aniqlik kiritadi portal. Jami moddalar bo‘yicha siyosatchi ayol 200 yilgacha qamoq jazosiga hukm qilinishi mumkin edi, deb qayd etdi Myanmar Now.
Noyabr oyida Myanma harbiylari mamlakat milliy kuni munosabati bilan 6000 kishini, jumladan Aun San Su Chini afv etgan edi. O‘shanda u 14 ta ish bo‘yicha 26 yillik qamoqda edi.
Siyosatchining advokatlari yangi hukmlar yuzasidan apellyatsiya berish niyatida. Himoya tomoni avvalgi barcha ishlar bo‘yicha qarorlarga e’tiroz bildirishga uringan, biroq shikoyatlar rad etilgan, deb yozadi portal.
Aun San Su Chji 1991-yilda tinchlik bo‘yicha Nobel mukofoti bilan taqdirlangan. 2016-yildan 2021-yilgacha u Myanma Davlat maslahatchisi va tashqi ishlar vaziri lavozimlarida ishlagan. O‘tgan yilning fevral oyida mamlakatda davlat to‘ntarishi sodir bo‘lib, hukumat harbiylar nazoratiga o‘tdi.
Izoh (0)