Myanma harbiylari mamlakat milliy bayrami munosabati bilan qabul qilingan amnistiyaga muvofiq 6000 kishini, jumladan bir qancha xorijliklarni qamoqdan ozod qildi, deb xabar bermoqda Reuters.
Ozod qilinganlar orasida Myanmaning sobiq davlat maslahatchisi, muxolifatdagi “Demokratiya uchun Milliy liga” partiyasi rahbari, tinchlik bo‘yicha Nobel mukofoti sovrindori (1991-yilda berilgan) Aun San Su Chji va uning iqtisodiy siyosat bo‘yicha maslahatchisi bo‘lgan avstraliyalik iqtisodchi Shon Tyurnel ham bor.
San Su Chji o‘ndan ortiq ayblovlar bo‘yicha 20 yilga qamalgan edi. 2016-yildan 2021-yilgacha u Myanma davlat maslahatchisi va tashqi ishlar vaziri lavozimlarida ishlagan. O‘tgan yilning fevral oyida mamlakatda davlat to‘ntarishi sodir bo‘lib, hukumat harbiylar nazoratiga o‘tdi. Tyurnel davlat siri haqidagi qonunni buzganlikda ayblandi.
Shuningdek, norozilik namoyishlarini qo‘zg‘atganlik aybi bilan o‘n yilga qamalgan yaponiyalik rejissyor Toru Kubota va immigratsiya qoidalarini buzganlikda ayblangan Buyuk Britaniyaning Myanmadagi sobiq elchisi Viki Bouman ham ozodlikka chiqdi.
Myanmadagi davlat to‘ntarishidan so‘ng norozilik namoyishlari boshlangan, ular davomida kamida 114 kishi halok bo‘lgan edi, deb yozmoqda Reuters va Myanmar Now. AFP 90 ga yaqin qurbonlar haqida xabar bergan. Hokimiyatga kelgan harbiylar tomonidan tuzilgan Davlat ma’muriy kengashi 2021-yilning avgust oyida muvaqqat hukumat tuzilganini e’lon qildi.
Mavzuga doir: Myanmada harbiylar 4 nafar muxolifatchini qatl qildi
Izoh (0)