Kambodjadagi 28-dekabr kuni boshlangan va faqat ertasi kuni uni o‘chirishga muvaffaq bo‘lingan mehmonxona-kazinoda yuz bergan yong‘in qurbonlari soni 26 kishiga yetdi. Bu haqda Associated Press xabar berdi.
Ma’lum qilinishicha, halok bo‘lganlarning 17 nafari Tailanddan, bir nafari Nepal, Malayziya va Xitoydan bo‘lgan. Olti nafar jasadning shaxsi esa hali aniqlanmagan. Boshqa ma’lumotlarga ko‘ra, hodisada 27 kishi halok bo‘lgan: 26 kishi Kambodjada, yana biri Tailand kasalxonasida.
Yong‘in oqibatida 57 kishi jarohatlangani, shifoxonalarda 27 kishi yotgani aytilmoqda. Jabrlanganlarning aksariyati qo‘shni Tailandga davolanish uchun yuborilgan.
Kambodja va Tailand chegarasida joylashgan Poypet shahridagi Grand Diamond City mehmonxona-kazino majmuasida 28-dekabr kuni kechasi yong‘in chiqdi. Yong‘in 12 soatdan ortiq vaqt davomida o‘chirilgan, qidiruv-qutqaruv operatsiyasi esa 39 soat davom etgan.
Yong‘in archa bezagi chirog‘idan foydalanish natijasida yuzaga kelgan elektr tokining ortiqcha yuklanishi tufayli boshlangan bo‘lishi mumkin. Hodisa sodir bo‘lgan vaqtda mehmonxonada 50 nafar Tailand fuqarosi bo‘lgan.
Tailandda kazinolar noqonuniy hisoblanadi, shuning uchun mamlakat fuqarolari o‘yin uchun Kambodjaga tashrif buyuradi. Yong‘in sodir bo‘lgan kazinoga chegaradan piyoda borish mumkin. Dastlab qurbonlar soni 19 kishini tashkil etgandi.
Izoh (0)