Xitoy qiruvchi samolyoti Janubiy Xitoy dengizida Amerika harbiy samolyoti bilan to‘qnashib ketishiga sal qoldi. Bu haqda The New York Times xabar berdi.
Ma’lum qilinishicha, hodisa 21-dekabr kuni Xitoy harbiy-dengiz kuchlarining J-11 qiruvchi samolyoti va AQSH harbiy-havo kuchlarining RC-135 samolyoti o‘rtasida yuz bergan. AQSHning Hind-Tinch okeani qo‘mondonligi ma’lumotlariga ko‘ra, Xitoyning qiruvchi samolyoti AQSH harbiy-havo kuchlari samolyotiga taxminan 3 metr masofada yaqinlashgan. Amerikalik uchuvchi to‘qnashuvni oldini olish uchun qochish manyovrlarini amalga oshirgan.
Vashington rasmiylariga ko‘ra, AQSH razvedka samolyoti xalqaro havo hududida Janubiy Xitoy dengizi uzra operatsiyalarni qonuniy ravishda amalga oshirgan.
Xitoy Janubiy Xitoy dengizining Vyetnam, Malayziya, Bruney, Indoneziya va Filippinning eksklyuziv iqtisodiy zonalari bilan kesishgan keng hududlariga da’vo qiladi. Bu suv yo‘li orqali har yili trillionlab dollarlik savdo aylanmalari o‘tadi. Zonada baliq ovlash maydonlari va gaz konlari mavjud. Ta’kidlanishicha, samolyotlar to‘qnashuvi ehtimolini AQSH Xitoy hukumati bilan muhokama qilgan. Xitoyning Vashingtondagi elchixonasi hozircha voqea yuzasidan izoh bermagan.
26-dekabr kuni Xitoy harbiy-havo kuchlarining 43 ta samolyoti Tayvan bo‘g‘ozining o‘rta chizig‘ini kesib o‘tgandi. Tayvan Xitoy samolyotlarini ogohlantirish uchun noma’lum jangovar samolyotlarni havoga ko‘targan.
23-dekabr kuni Xitoyning 39 ta samolyoti Tayvanning havo mudofaa zonasiga kirgan. Shuningdek, orol yaqinida Xitoy flotining uchta harbiy kemasi qayd etilgan. Tayvan havo mudofaa tizimlari Xitoy samolyotlarining harakatini kuzatgan. Tayvan qiruvchi samolyotlari havoga ko‘tarilgan.
Izoh (0)