Камбоджадаги 28 декабрь куни бошланган ва фақат эртаси куни уни ўчиришга муваффақ бўлинган меҳмонхона-казинода юз берган ёнғин қурбонлари сони 26 кишига етди. Бу ҳақда Associated Press хабар берди.
Маълум қилинишича, ҳалок бўлганларнинг 17 нафари Таиланддан, бир нафари Непал, Малайзия ва Хитойдан бўлган. Олти нафар жасаднинг шахси эса ҳали аниқланмаган. Бошқа маълумотларга кўра, ҳодисада 27 киши ҳалок бўлган: 26 киши Камбоджада, яна бири Таиланд касалхонасида.
Ёнғин оқибатида 57 киши жароҳатлангани, шифохоналарда 27 киши ётгани айтилмоқда. Жабрланганларнинг аксарияти қўшни Таиландга даволаниш учун юборилган.
Камбоджа ва Таиланд чегарасида жойлашган Пойпет шаҳридаги Grand Diamond City меҳмонхона-казино мажмуасида 28 декабрь куни кечаси ёнғин чиқди. Ёнғин 12 соатдан ортиқ вақт давомида ўчирилган, қидирув-қутқарув операцияси эса 39 соат давом этган.
Ёнғин арча безаги чироғидан фойдаланиш натижасида юзага келган электр токининг ортиқча юкланиши туфайли бошланган бўлиши мумкин. Ҳодиса содир бўлган вақтда меҳмонхонада 50 нафар Таиланд фуқароси бўлган.
Таиландда казинолар ноқонуний ҳисобланади, шунинг учун мамлакат фуқаролари ўйин учун Камбоджага ташриф буюради. Ёнғин содир бўлган казинога чегарадан пиёда бориш мумкин. Дастлаб қурбонлар сони 19 кишини ташкил этганди.
Изоҳ (0)