Rossiya, Vyetnam va Kuba diplomatlari Shimoliy Koreya yetakchisi Kim Chen Inni yaqinlashib kelayotgan Yangi yil bilan tabriklab, unga bir savatdan gul jo‘natishdi. Bu haqda Koreya Markaziy telegraf agentligi xabar berdi.
“Hurmatli Kim Chen Inga 29-dekabr kuni Rossiya diplomatik korpusi xodimlari, Kubaning favqulodda va muxtor elchisi hamda Vyetnam elchixonasi harbiy attashesi nomidan savatchada gullar va tabrik maktublari topshirildi”, — deyiladi xabarda.
Avvalroq Misr prezidenti Abdulfattoh as-Sisi va Falastin prezidenti Mahmud Abbos Kim Chen Inni yaqinlashib kelayotgan Yangi yil bilan tabriklagan edi. As-Sisi Shimoliy Koreya rahbariga telegramma yo‘llab, unda 2023-yil “butun dunyo xalqlari uchun farovonlik yili bo‘lishini” tilagan.
“Yangi yilda ikki tomonlama munosabatlarni yanada mustahkamlash uchun kuchli choralar ko‘rilishini tilayman”, — deb yozgan as-Sisi KXDR xalqiga “yorqin kelajak” tilab.
Abbos ham diplomatlar singari Kim Chen Inga gul yuborgan.
Shimoliy Koreyaning o‘ziga xos yil hisoblash tartibi bor, u KXDR asoschisi Kim Ir Senning tug‘ilgan yilidan (1912) boshlanadi.
Izoh (0)