Belarus Mudofaa vazirligi 13-dekabr kuni respublika Qurolli kuchlarining jangovar tayyorgarligi bo‘yicha kutilmagan tekshiruv e’lon qildi. Tekshiruv Aleksandr Lukashenkoning ko‘rsatmasi bilan boshlangan.
Vazirlik matbuot xizmati xabariga ko‘ra, tekshiruv doirasida “qo‘shinlar imkon qadar tezroq shartli hududlarda oldinga siljishi, muhandislik jihozlarini ishga tushirishi, qo‘riqlash va mudofaani tashkillashtirishi, Neman va Berezina daryolari orqali ko‘prikli kechuv joylarini qurishi kerak bo‘ladi”.
Urushni o‘rganish bo‘yicha Amerika instituti (ISW) 11-dekabr kungi hisobotida Rossiya Belarusda doimiy harbiy baza o‘rnatishga intilayotgani va Minskni Ukrainadagi hujumkor harakatlarni qo‘llab-quvvatlashga majburlash maqsadida “axborot kampaniyalari” o‘tkazayotgani haqida xabar bergandi. Biroq, ekspertlarning fikriga ko‘ra, “mamlakat ichidagi ichki dinamika tufayli” yaqin kelajakda Belarusning Ukrainaga bostirib kirishi dargumon.
Ukraina Qurolli kuchlari Bosh shtabining 13-dekabrdagi tonggi hisobotida aytilishicha, ukrainalik harbiylar Belarusdan hujumchi guruh tuzilgani bo‘yicha hech qanday belgilar ko‘rmayapti. Shu bilan birga, “Belarusskiy gayun” monitoring guruhi rossiyalik harbiylar Belarusdagi texnikalarini Ukraina chegaralariga yaqinlashtirayotgani haqida xabar bergan.
Izoh (0)