Belarus Ukrainaga qarshi urushda bevosita qatnashishi ehtimoli kam. Aleksandr Lukashenko, katta ehtimol bilan, Rossiya prezidenti Vladimir Putinning Ukrainadagi urushda qatnashish taklifini rad etgan. Urushni tadqiq qilish instituti (ISW) tahlilchilari shunday xulosaga keldi.
ISW Rossiya va Belarus rahbarlari Ukrainadagi urushni muhokama qilishdan tiyilganiga e’tibor qaratdi. Shu bilan birga, Minsk, go‘yoki, “G‘arbdan xavfga duch kelgani”ni aytdi. O‘z navbatida, Putin belaruslik uchuvchilarni “maxsus jangovar kallaklardan iborat o‘q-dorilar”ni qo‘llashga o‘rgatish imkoniyatini ko‘rib chiqishni taklif qildi.
“Lukashenko Rossiyaning Ukrainadagi harakatlarida qatnashishdan uzoq turishga intilib, Belarus chegaralarini G‘arb va NATOdan himoya qilish haqida gapirib keladi. Belarus prezidenti shunga o‘xshash imo-ishoralardan 17-fevral kuni ham foydalanib, go‘yoki, G‘arb tomonidan tajovuz fonida Belarusga yadro quroli joylashtirilishi mumkinligini aytgandi”, — deyiladi ISW xabarida.
Ayni vaqtda Lukashenko Moskva S-400 havo hujumiga qarshi mudofaa tizimlari va “Iskander” majmualarini taqdim etishini ma’lum qildi. Rossiya prezidenti so‘zlariga ko‘ra, tomonlar, shuningdek, mudofaa makonini yaratishni ham muhokama qilgan. Shu munosabat bilan, tahlilchilar Lukashenko Belarusning Ukrainaga qarshi urushga jalb etilishiga rozi bo‘lmagan, degan xulosaga keldi, chunki, aks holda, u o‘z gapirish tarzini o‘zgartirishiga to‘g‘ri kelgan bo‘lardi.
Eslatib o‘tamiz, 19-dekabr kuni Rossiya prezidenti Vladimir Putin bir necha yil ichida birinchi marta Aleksandr Lukashenko bilan uchrashish uchun Minskka keldi.
ISW tahlilchilari Putin bu bilan Ukrainaga qarshi urushning yangi bosqichi uchun axborot sharoitlarini yaratishga urinayotganini ma’lum qildi. Bundan tashqari, Belarus tomonidan hujum imkoniyatlari ham istisno qilinmagandi.
O‘z navbatida, Ukraina Milliy xavfsizlik va mudofaa xizmati kotibi Aleksey Danilovning fikricha, Putin o‘z tashrifi chog‘ida Lukashenkoga bosim o‘tkazib, uning Belarus qo‘shinlarini Ukrainaga qarshi urushga yuborishga imkon berishiga erishmoqchi bo‘lgan, biroq Minsk urush qilishni istamagan.
Avvalroq Rossiya prezidenti Vladimir Putin mamlakatning Belarusni “o‘zlashtirib olish”, “o‘ziga singdirib olish” rejalarini rad etgan va buni safsata deb atagan edi. “Gap o‘zlashtirib olishda emas, masala iqtisodiy siyosatni kelishib olishda, xuddi boshqa ko‘plab integratsion birlashmalarda bo‘lgani kabi”, — deya Putin bunday mish-mishlar haqidagi savollarga javob berdi.
Mavzuga doir:
Izoh (0)