Belarus hududiga mahalliy vaqt bilan soat 10:00 dan 11:00 gacha bo‘lgan vaqt oralig‘ida Ukrainadan S-300 kompleksining raketasi qulab tushdi. Bu haqda “Belta” xabar berdi.
Holat yuzasidan Belarus prezidenti Aleksand Lukashenko zudlik bilan ogohlantirildi. Uning topshirig‘iga ko‘ra, Tergov qo‘mitasi va Mudofaa vazirligi xodimlaridan bir guruh mutaxassislar qulash sabablarini aniqlamoqda. Hozirda voqeaning ikkita asosiy versiyasi ko‘rib chiqilmoqda. Ulardan birida raketa Belarus hududiga yaqinda Polshadagi voqeaga o‘xshab noto‘g‘ri yo‘nalishda kelib tushgan. Ikkinchiga ko‘ra, raketa Belarus havo mudofaa tizimlarining ishlashi natijasida urib tushirilgan.
Voqea joyida Belarus Tergov qo‘mitasi, Ichki ishlar va Mudofaa vazirliklari mutaxassislari ishlamoqda. Qurbonlar haqida hozircha ma’lumot yo‘q.
Eslatib o‘tamiz, 15-noyabr kuni Polshaning Ukraina bilan chegaradosh Prjevodov qishlog‘iga ikkita raketa tushdi, ikki kishi halok bo‘ldi. Voqea sababli Polsha bosh vaziri Mateush Moraveski xavfsizlik va mudofaa bo‘yicha hukumat qo‘mitasining shoshilinch yig‘ilishini o‘tkazdi. Rossiya Xavfsizlik kengashi raisi o‘rinbosari Dmitriy Medvedev Polshada qulagan raketa bilan bog‘liq voqea G‘arb jahon urushi ehtimolini oshirayotganini isbotlashini aytdi.
Turkiya prezidenti Polshaga tushgan raketalarning Rossiyaga aloqasi yo‘qligini aytdi. NATO bosh kotibi ham raketalarning Ukrainaga tegishli ekani ehtimoli yuqoriligini bildirdi. Ammo bunda Kiyev aybdor emasligi, Rossiya javobgar ekanini aytdi. Polsha prezidenti ham shunday fikrlarni ilgari surdi. Germaniya va Britaniya esa Polshaga raketa tushishiga “Putin urushi” sababchiligini ta’kidladi.
5-dekabr kuni Moldovaning Ukraina bilan chegaradosh hududiga ham raketa kelib tushgandi. Portlamay qolgan raketa Brichan shahri yaqinidagi bog‘da chegara politsiyasi tomonidan aniqlangan. Hodisa joyi qurshab olingan va huquq-tartibot xodimlari ishlamoqda. Hozircha mamlakat Ichki ishlar vazirligi raketaning kimga tegishli ekani haqida ma’lumot bermagan.
Izoh (0)