Беларусь қўшинлари зенитли ракета бошқармаси бошлиғи полковник Кирилл Казансев айтишича, Мудофаа вазирлиги мамлакат ҳудудига ракета бўлаклари келиб тушиши сабабларидан бири сифатида Украина қуролли кучлари томонидан провокация кўриб чиқилмоқда. Шу билан бирга, мудофаа идораси ҳодиса ракета носозлиги туфайли юз берган бўлиши мумкинлигини истисно қилмаяпти.
«Биз иккита версияни кўриб чиқяпмиз: ҳарбийлар яхши ўқитилмагани туфайли ёки ракета носозлиги оқибатида зенитли бошқарилувчи ракета бехосдан учирилган ёки бўлмаса, бу Украина қуролли кучларининг атайлаб қилинган провокацияси бўлган», — деди Казансев Беларусь Мудофаа вазирлиги Telegram-каналида эълон қилинган видеода.
Кеча, 29 декабрь куни эрталаб Беларуснинг Брест вилояти Иванов тумани Горбах қишлоғи яқинига (у Украина чегарасидан 15 км масофада жойлашган) ракета келиб тушди. Дастлабки маълумотларга кўра, бўлаклар Украина ҳудудидан учирилган C-300 зенитли бошқарилувчи ракетага тегишли. Беларусь Украинадаги жанговар ҳаракатларда иштирок этмаётган, аммо ҳудудига ракета келиб тушган учинчи мамлакатга айланди. Бундан аввал шунга ўхшаш ҳолатлар Польша ва Молдовада ҳам юз берганди.
Изоҳ (0)