Россиянинг узрини қабул қилдик — Қозоғистон ТИВ Россия элчисининг шов-шувли баёноти ҳақида

Россия томони ўз элчиси Алексей Бородавкиннинг Қозоғистондаги «миллатчилар ва русофобия» ҳақида шов-шувга сабаб бўлган баёноти юзасидан узр сўради. Бу ҳақда Қозоғистон Ташқи ишлар вазирлиги расмий вакили Ойбек Смадиёров маълум қилди, деб ёзади Asia Plus.

«Алексей Бородавкин билан тегишлича суҳбатлар олиб борилди. Бундан ташқари, Мажилис спикери Ерлан Кошанов Россия элчисининг баёнотлари юзасидан изоҳ берди. Шунингдек, Россия ташқи ишлар вазири Сергей Лавров ҳам бу масалада тушунтириш берди. Бу масала бугунги кунда ўз якунини топди, деб ҳисоблаймиз. Россия томонининг узрини қабул қилдик», — деди у.

ТИВ вакили таъкидлашича, Қозоғистон ва Россия ўртасидаги муносабатлар давлат раҳбари томонидан белгиланади. Президент Қосим-Жўмарт Тўқаевнинг Россияга сўнгги ташрифи чоғида томонлар дипломатик алоқалар ўрнатилганига 30 йил тўлиши муносабати билан декларация имзолаган эди.

«Бизнинг президентимиз қайд этганидек, бу вақт ичида давлатларимиз дўстлик ва аҳил қўшничиликнинг мустаҳкам ришталарига асосланган ўзаро манфаатли стратегик шерикликни қуришга муваффақ бўлди. Мамлакатларимиз ўртасида ўзаро ишончга асосланган конструктив мулоқот йўлга қўйилган, ҳамкорликнинг юқори даражасига эришилган. Ўртамизда қизғин масалалар йўқ», — дея хулоса қилди Смадиёров.

Шов-шув Бородавкиннинг декабрдаги интервьюсидан кейин юзага келганди, ўшанда у шундай деганди: «Афсуски, миллатчилик тенденцияларини тасдиқлай оламан ва бу борада хавотир билдираман. Қозоғистонда радикал, таъкидлаб айтаман, миллатчилик тенденциялари тобора яққолроқ намоён бўлмоқда». Шунингдек, элчи «агар Россиядан бу ҳақда илтимос қилишса», у Қозоғистонга экстремизм ва миллатчиликни йўқ қилишда ёрдам беришга тайёрлигини айтганди.

Унинг бу баёнотини изоҳлар экан, Мажилис спикери Ерлан Кошанов Бородавкин — жуда тажрибали дипломат эканини ва «пропагандачилар ва сиёсатшуносларга тенглашмаслиги кераклигини» айтди.

Ўз навбатида, Россия ташқи ишлар вазири Сергей Лавров элчининг гаплари Россия ТИВ позициясини англатмаслигини, устига-устак, у «Алексей Николаевич Бородавкиннинг ҳам позициясини акс эттирмаслигини, чунки у Қозоғистон ОАВлари даъво қилаётган баёнотни у ҳеч қачон бермаганини» айтди. Лавров қайд этишича, Россия ТИВ мамлакатлар ўртасидаги муносабатлар «фақат президентлар томонидан белгиланиши»дан келиб чиқади.