Zelenskiy ruslarni o‘ldirishga chaqirgan Qozog‘istondagi elchini ishdan bo‘shatdi

Ukraina prezidenti Vladimir Zelenskiy “iloji boricha ko‘proq ruslarni o‘ldirish”ga chaqirgan Qozog‘istondagi elchi Pyotr Vrublyovskiyni lavozimidan ozod qildi, deb xabar bermoqda “RBK”.

Ukrainaning Qozog‘istondagi elchisi Pyotr Vrublyovskiy qozog‘istonlik bloger Dias Kuzairovga bergan intervyusida Ukrainaning maqsadi — iloji boricha ko‘proq ruslarni o‘ldirish ekanini aytgandi.

Vrublyovskiyning intervyusidan parcha 22-avgust kuni Rossiya TIV rasmiy vakili Mariya Zaxarovaning Telegram-kanalida e’lon qilindi. Ushbu videoda Vrublyovskiy Ukraina “iloji boricha ko‘proq ruslarni o‘ldirmoqchiligini” aytgan. Shuningdek, u: “Hozir biz ruslarni qanchalik ko‘p o‘ldirsak, farzandlarimiz o‘ldirishi uchun ular shunchalik kam qoladi”, — degan.

“Bunday gapni faqat terrorchilik rejimi elchisigina aytishi mumkin. Sakkiz yil davomida Kiyev natsistlari jimgina qotillik qilib, hamma narsada Moskvani ayblab kelgandi, endi esa milliy tozalash rejalari haqida baralla aytilmoqda”, — deya izoh berdi Zaxarova.

Rossiya Tergov qo‘mitasi videoga baho berib, barcha ishtirokchilarning shaxslarini tekshirishini hamda ularning avvalroq rossiyalik harbiy xizmatchilarga qarshi amalga oshirilgan jinoyatlarga aloqadorligini tekshirishini ma’lum qildi.

5-sentabr kuni esa Vrublyovskiy intervyuda aytgan gaplari uchun uzr so‘rab, ta’tilga chiqib ketgandi.

Keyinroq u Pyotr Vrublyovskiy Ostonaga qaytib kelgan, Rossiya Tashqi ishlar vazirligi vakili Mariya Zaxarova bunga javoban Qozog‘istonni “banderovchi emissar hech qachon Ostonaga qaytmasligi” haqidagi va’dasini buzganlikda ayblagandi. Shuningdek, u Qozog‘iston elchisi Yermek Kosherbayev Rossiya TIVga chaqirilib, unga bunday vaziyat nomaqbulligi tushuntirilganini aytdi.

Shundan keyin Qozog‘iston TIV vakili Aybek Smadiyarov Zaxarova izohlarining ohangi “Qozog‘iston va Rossiyaning teng huquqli strategik sheriklar sifatidagi ittifoqdoshlik munosabatlari xususiyati bila uyg‘un emas”ligini qayd etdi va Rossiya elchisi Aleksey Borodavkin Qozog‘iston TIVga chaqirilganini ma’lum qildi.

Shu bilan birga, Smadiyarov Ukraina elchisi tez orada almashtirilishini, chunki Qozog‘iston tomoni Rossiya haqidagi gaplari uchun uning maqomini “nomaqbul” deb hisoblashini aytdi.

“Ayni paytda Ukraina TIVdan Ostonada yangi elchini tayinlash haqida so‘rov olindi. Qayd etishim kerak, Ukraina tomoni bilan bu masalada to‘liq hamjihatligimiz bor”, — deya qo‘shib qo‘ygan edi Qozog‘iston TIV vakili o‘shanda.